Туркиядан тўғридан тўғри хорижий инвестициялар ҳажми 10 баробар ошди, деб хабар бермоқда Инвестициялар, саноат ва савдо вазирлиги ахборот хизмати.
Маълум қилинишича, инвестициялар, саноат ва савдо вазирининг биринчи ўринбосари Нозимжон Холмуродов Туркия пойтахтида бўлиб ўтган “Ўзбекистон-Туркия стратегик муносабатлари — келажакнинг комплекс истиқболлари” мавзусига бағишланган симпозиумда иштирок этди.
Туркия Миллий кутубхонасида бўлиб ўтган йирик тадбирда Туркия президенти администрацияси вакиллари, икки давлатнинг вазирлик ва идоралар раҳбарлари, етакчи сиёсатшунослари ва экспертлари Ўзбекистон ва Туркия ўртасидаги стратегик ҳамкорликнинг кўламини кенгайтириш масалаларини муҳокама қилиш ва консептуал ечимларни ишлаб чиқиш мақсадида йиғилди.
Сўзга чиққанлар Ўзбекистон ва Туркия ўртасидаги икки томонлама савдо-иқтисодий ва сармоявий ҳамкорлик ўсиш динамикасининг юксак натижаларини қайд этди. Хусусан, сўнгги беш йилда икки давлат ўртасидаги ўзаро товар айирбошлаш ҳажми 1,3 баробар, Ўзбекистонда турк капитали иштирокидаги корхоналар сони 3 баробарга ошиб, 1898 тага, Туркиядан тўғридан-тўғри хорижий инвестициялар ҳажми 10 баробар ошди.
Ўтган йил давомида 260 та янги ўзбек-турк қўшма корхонаси ташкил этилди ва бу Туркияни Ўзбекистондаги қўшма корхоналар сони бўйича бошқа ҳамкорлар орасида учинчи ўринга олиб чиқди. Икки давлат ўртасидаги мунтазам авиақатновлар сони 2,5 баробарга кўпайиб, ҳафтасига 90 тага етди.
Шу билан бирга, Ўзбекистонда инвестиция муҳитини янада яхшилаш бўйича амалга оширилаётган самарали чора-тадбирлар, жумладан, йиллик иқтисодий ўсиш 6 фоизга оширилгани, инфляция даражаси 9 фоизга пасайгани, ЖСТ стандартларига мувофиқ “Тўғридан тўғри инвестициялар тўғрисида”ги қонуннинг янги таҳрири ишлаб чиқилгани, ЭИЗларда самарали бошқарув тизими жорий этилгани, солиқлар ставкалари ва сони пасайтирилгани, йирик компаниялар акцияларини хусусийлаштириш ва IPOга чиқариш бўйича янги дастур амалга оширилаётгани, Тошкент халқаро Арбитраж маркази ўз ишини бошлагани ва бошқа кўрилаётган чоралар қайд этилди.
Ўзбекистон томони Туркия ҳукумати, сармоявий ва саноат доиралари билан кўп қиррали муносабатларни янада мустаҳкамлашга содиқлигини билдирди.
Изоҳ (0)