Литванинг амалдаги президенти Гитанас Науседа президентлик сайловларининг иккинчи босқичида ғалаба қозонди. Бош сайлов комиссиясининг дастлабки маълумотларига кўра, Науседага сайловчиларнинг 75 фоиздан ортиғи овоз берган.
Сайловдаги иккинчи номзод, бош вазир Ингрида Шимоните эса 22 фоиз овоз тўплаган.
“Мен фаровон давлатни янада татбиқ этиш ҳақида жиддий ўйлаяпман”, — деди Гитанас Науседа.
Бундан беш йил аввал бўлиб ўтган президентлик сайловида у ўз сиёсатининг асосий йўналиши сифатида фаровон давлат яратишни танлаганди. Шунингдек, Литванинг ҳозирги ташқи сиёсатини давом эттиришга ваъда берган. Науседа Литва Европа Иттифоқи ва НАТО билан ҳамкорликдан янада кўпроқ фойда олишига умид билдирмоқда.
Бу Гитанас Науседа учун иккинчи ва охирги президентлик муддати бўлади. Литва конституциясига кўра, президент кетма-кет икки мартадан ортиқ сайланиши мумкин эмас.
Гитанас Науседа иқтисодчи бўлиб, Вильнюс университетида таҳсил олган. Шунингдек, у ижтимоий фанлар доктори даражасига эга. Иқтисодиёт ва хусусийлаштириш институтида, Нархлар ва рақобат давлат хизматида, Литва банкида ишлаган. Вильнюс университетида қарийб 30 йил дарс берган, 18 йил хусусий банкда фаолият юритган.
Сайловда номзодини қўйган бош вазир Ингрида Шимоните аллақачон Гитанас Науседани ғалабаси билан табриклаган. Сайловнинг биринчи босқичида Шимоните 33 фоиз овоз олганди. Сиёсатчиларнинг ҳар иккиси Украинани қўллаб-қувватлайди ва Россияни танқид қилади.
Изоҳ (0)