Ханой шаҳрида 2025 йили Ўзбекистон — Вьетнам бизнес форуми ва саноат кўргазмаси ўтказилади
Президент Шавкат Мирзиёев Қозон шаҳрида бўлиб ўтаётган БРИКС саммити доирасида Вьетнам Социалистик Республикаси бош вазири Фам Мин Тин билан учрашув ўтказди. Бу ҳақда Президент матбуот хизмати хабар берди.
Фото: Президент матбуот хизмати
Учрашувда Ўзбекистон билан Вьетнам ўртасидаги кўп қиррали ҳамкорлик ва амалий алоқаларни, айниқса савдо-иқтисодиёт ва инвестиция соҳаларида ривожлантириш масалалари муҳокама қилинди.
Ҳукуматлараро ва идоралараро мулоқотларга тизимли тус бериш зарурлиги таъкидланди. Томонлар келгуси йил бошида Ханой шаҳрида Савдо-иқтисодий масалалар бўйича қўшма комиссиянинг навбатдаги йиғилишини, шунингдек, бизнес форуми ва саноат кўргазмасини ўтказишга келишиб олди.
Фото: Президент матбуот хизмати
Янги лойиҳаларни илгари суриш мақсадида нефть-кимё, электротехника, тўқимачилик, қишлоқ хўжалиги ва бошқа соҳаларда саноат кооперациясини ривожлантириш дастурини тайёрлаш таклиф этилди. Ишбилармонлик ва сайёҳлик алоқаларини, шу жумладан, визасиз тартиб жорий этиш орқали кенгайтиришга алоҳида эътибор қаратилди.
Фото: Президент матбуот хизмати
Бўлажак олий ва юқори даражадаги учрашувлар жадвали кўриб чиқилди. Бош вазир Фам Мин Тин Ўзбекистон президентини расмий ташриф билан Вьетнамга келишга таклиф этди.
Шавкат Мирзиёев БРИКС саммити доирасида Қозонга ташрифининг биринчи куни
Шавкат Мирзиёев БРИКС саммити тадбирларида иштирок этиш ва қатор икки томонлама учрашувлар ўтказиш учун Қозон шаҳрига 23 октябрь куни ташриф буюрди. Уни аэропортда Татаристон раиси Рустам Минниханов, Қозон шаҳри мери Илсур Мецҳин ва бошқа расмий шахслар кутиб олди. Ташрифнинг биринчи куни Шавкат Мирзиёев БРИКС саммити иштирокчиларини қутлаш маросимида қатнашди. Хитой раиси Си Цзиньпин ва Миср президенти Абдулфаттоҳ ас-Сиси билан суҳбатлашди, Ҳиндистон бош вазири Нарендра Моди ва Туркия президенти Ражаб Тоййиб Эрдўғон билан учрашув ўтказди. БРИКСнинг Янги тараққиёт банки президенти Дилма Русеф ва “Сбербанк” президенти ва бошқарув раиси Герман Грефни қабул қилди.
Саммит доирасида Шавкат Мирзиёев ва Рустам Минниханов учрашиб, Ўзбекистон ҳудудларининг Татаристон билан ўзаро манфаатли ва кўп қиррали ҳамкорлигини янада кучайтириш масалаларини муҳокама қилди. Рустам Минниханов Шавкат Мирзиёевни Татаристон давлат мукофоти — “Дўстлик” ордени билан тақдирлади.
БРИКС бирлашмаси 2006 йилда ташкил этилган. Ҳозирда Бразилия, Россия, Ҳиндистон, Хитой, Жанубий Африка Республикаси, Бирлашган Араб Амирликлари, Эрон, Миср ва Эфиопия унинг аъзолари ҳисобланади.
Изоҳ (0)