Xanoy shahrida 2025-yili O‘zbekiston — Vyetnam biznes forumi va sanoat ko‘rgazmasi o‘tkaziladi
Prezident Shavkat Mirziyoyev Qozon shahrida bo‘lib o‘tayotgan BRIKS sammiti doirasida Vyetnam Sotsialistik Respublikasi bosh vaziri Fam Min Tin bilan uchrashuv o‘tkazdi. Bu haqda Prezident matbuot xizmati xabar berdi.
Foto: Prezident matbuot xizmati
Uchrashuvda O‘zbekiston bilan Vyetnam o‘rtasidagi ko‘p qirrali hamkorlik va amaliy aloqalarni, ayniqsa savdo-iqtisodiyot va investitsiya sohalarida rivojlantirish masalalari muhokama qilindi.
Hukumatlararo va idoralararo muloqotlarga tizimli tus berish zarurligi taʼkidlandi. Tomonlar kelgusi yil boshida Xanoy shahrida Savdo-iqtisodiy masalalar bo‘yicha qo‘shma komissiyaning navbatdagi yig‘ilishini, shuningdek, biznes forumi va sanoat ko‘rgazmasini o‘tkazishga kelishib oldi.
Foto: Prezident matbuot xizmati
Yangi loyihalarni ilgari surish maqsadida neft-kimyo, elektrotexnika, to‘qimachilik, qishloq xo‘jaligi va boshqa sohalarda sanoat kooperatsiyasini rivojlantirish dasturini tayyorlash taklif etildi. Ishbilarmonlik va sayyohlik aloqalarini, shu jumladan, vizasiz tartib joriy etish orqali kengaytirishga alohida eʼtibor qaratildi.
Foto: Prezident matbuot xizmati
Bo‘lajak oliy va yuqori darajadagi uchrashuvlar jadvali ko‘rib chiqildi. Bosh vazir Fam Min Tin O‘zbekiston prezidentini rasmiy tashrif bilan Vyetnamga kelishga taklif etdi.
Shavkat Mirziyoyev BRIKS sammiti doirasida Qozonga tashrifining birinchi kuni
Shavkat Mirziyoyev BRIKS sammiti tadbirlarida ishtirok etish va qator ikki tomonlama uchrashuvlar o‘tkazish uchun Qozon shahriga 23-oktyabr kuni tashrif buyurdi. Uni aeroportda Tatariston raisi Rustam Minnixanov, Qozon shahri meri Ilsur Metshin va boshqa rasmiy shaxslar kutib oldi. Tashrifning birinchi kuni Shavkat Mirziyoyev BRIKS sammiti ishtirokchilarini qutlash marosimida qatnashdi. Xitoy raisi Si Szinpin va Misr prezidenti Abdulfattoh as-Sisi bilan suhbatlashdi, Hindiston bosh vaziri Narendra Modi va Turkiya prezidenti Rajab Toyyib Erdo‘g‘on bilan uchrashuv o‘tkazdi. BRIKSning Yangi taraqqiyot banki prezidenti Dilma Rusef va “Sberbank” prezidenti va boshqaruv raisi German Grefni qabul qildi.
Sammit doirasida Shavkat Mirziyoyev va Rustam Minnixanov uchrashib, O‘zbekiston hududlarining Tatariston bilan o‘zaro manfaatli va ko‘p qirrali hamkorligini yanada kuchaytirish masalalarini muhokama qildi. Rustam Minnixanov Shavkat Mirziyoyevni Tatariston davlat mukofoti — “Do‘stlik” ordeni bilan taqdirladi.
BRIKS birlashmasi 2006-yilda tashkil etilgan. Hozirda Braziliya, Rossiya, Hindiston, Xitoy, Janubiy Afrika Respublikasi, Birlashgan Arab Amirliklari, Eron, Misr va Efiopiya uning aʼzolari hisoblanadi.
Izoh (0)