Қозон шаҳрига ташрифнинг биринчи кунида президент Шавкат Мирзиёев BRICS саммити доирасида Туркия президенти Ражаб Тоййиб Эрдўғон билан учрашув ўтказди. Бу ҳақда Президент матбуот хизмати хабар бермоқда.
Учрашувда Ўзбекистон—Туркия кенг қамровли стратегик шериклик муносабатларини янада чуқурлаштириш бўйича долзарб масалалар атрофлича кўриб чиқилган.
Икки давлат раҳбарлари сиёсий, савдо-иқтисодий, инвестициявий, маданий ва гуманитар соҳалардаги кўп қиррали ҳамкорликни кенгайтириш муҳимлигини таъкидлади.
Президентлар фаол мулоқотлар ва самарали алмашинувларни давом эттириш зарурлигини қайд этган.
Геология ва минерал ресурсларни қазиб чиқариш, электротехника, машинасозлик, соғлиқни сақлаш, таълим ва бошқа соҳаларда кооперация лойиҳаларини илгари суриш масалаларига алоҳида эътибор қаратилган.
Қўшма маданий-гуманитар тадбирларни мунтазам ўтказиб бориш зарурлиги алоҳида таъкидланган. Шунингдек, етакчилар халқаро ва минтақавий кун тартибининг муҳим жиҳатлари юзасидан ҳам фикр алмашилган.
Аввалроқ Шавкат Мирзиёев Ҳиндистон бош вазири Нарендра Моди билан учрашган эди.
Шавкат Мирзиёевни ушбу саммитда иштирок этишга Владимир Путин таклиф қилган. Ўзбекистон президенти “BRICS плюс” форматидаги ялпи сессияда нутқ сўзлайди. Учрашув кун тартибидан инклюзив ва барқарор тараққиётни таъминлаш мақсадида халқаро ҳамкорликни кенгайтириш масалалари ўрин олган. Шунингдек, глобал сиёсатнинг долзарб жиҳатлари муҳокама қилинади.
Маълумот учун, BRICS бирлашмаси 2006 йилда ташкил этилган. Бразилия, Россия, Ҳиндистон, Хитой, Жанубий Африка Республикаси, Бирлашган Араб Амирликлари, Эрон, Миср ва Эфиопия унинг аъзолари ҳисобланади.
Изоҳ (0)