Рим папаси Франциск 21 апрель куни 88 ёшида вафот этди. Бу ҳақда Ватикан баёнотига таяниб Reuters хабар берди.
Папа 88 ёшда эди. Февраль ойи ўрталарида у бронхитни даволаш учун Римнинг “Жемелли” клиникасига ётқизилган, сўнгра текширувлар икки томонлама пневмония бошланганини кўрсатган. Папа касалхонада беш ҳафта ётган, тўрт марта нафас олиш инқирозини бошдан кечирган, унинг ҳаёти икки марта хавф остида қолди, дейилади баёнотда.
23 март куни понтификни касалхонадан чиқаришган эди. Шундан сўнг у фақат бир марта омма олдида пайдо бўлган, аммо бир нечта қабуллар ўтказган. Хусусан, апрель ойи бошида у Британия қироли Чарльз III ни, Пасха шанбасида эса АҚШ вице-президенти Жей Ди Венсни қабул қилганди.
Папа 2013 йил Рим-католик черкови раҳбариятини ўз қўлига олганидан бери жами тўрт марта касалхонага ётқизилган. У 2021 йилда қорин бўшлиғида жиддий жарроҳлик амалиётини ўтказган. Бундан ташқари, 2023 йилда чандиқ тўқимасини ва қорин чуррасини даволаш мақсадида яна бир операцияни бошдан кечирган.
Ёшлигида папа касалликдан сўнг ўпкасининг бир қисмини олдириб ташлаган, шунинг учун тез-тез нафас йўллари касалликлари хуружидан азият чекарди. Францискнинг тиззасида ҳам муаммолар бор, шу сабабли у сўнгги йилларда ногиронлик аравачаси ва ҳассадан фойдаланганди.
Изоҳ (0)