АҚШ президенти Жо Байден Бирлашган Миллатлар Ташкилотининг иқлим бўйича саммитида (COP28) қатнашмайди. Бу ҳақда The New York Times Оқ уйдаги манбага таяниб хабар берди. Нашр ёзишича, саммитда Британия қироли Чарльз III, Рим папаси Франциск ҳамда 200 га яқин давлат раҳбарлари иштирок этади.
Байденнинг саммитда иштирок этмаслиги сабаби айтилмаган. Тахминларга кўра, у Исроил ва ҲАМАС ўртасидаги уруш мавзуси билан овора. Хусусан, Байденнинг иқлим ўзгариши бўйича махсус вакили Жон Керри ўтган ҳафта президентнинг саммит режалари ҳақидаги саволга жавоб берар экан: “Яқин Шарқда ва Украинада уруш, кўп ишлар содир бўляпти”.
NYT аниқлик киритишича, вице-президент Камала Ҳаррис ҳам COP28 да қатнашмоқчи эмас. Ҳозирча фақат Керри ва унинг жамоаси саммитга бориши аниқ.
Байден президентлиги даврида ўтказилган аввалги икки саммитда қатнашган. 2021 йилда тадбир Шотландияда, ўтган йили Мисрда бўлиб ўтди. Бу йилги COP28 Дубайда (БАА) 30 ноябрдан 12 декабргача ўтказилади.
Иқлим кун тартиби Байденнинг муҳим сиёсат мавзуларидан биридир. Хусусан, у АҚШ тарихидаги биринчи Миллий иқлим бўйича ишчи гуруҳини тузган. Унинг вазифалари орасида:
- 2030 йилгача мамлакатда иссиқхона газлари чиқиндиларини 2005 йилдаги даражадан 50 фоизга камайтириш;
- 2035 йилгача атроф-муҳитни карбонат ангидрид билан ифлослантирмайдиган электр энергиясига ўтиш;
- 2050 йилга келиб заҳарли газ ажралишини нолга тенглаштириш;
- федерал иқлим ва тоза энергия инвестицияларининг 40 фоизини кам даромадли гуруҳларга бағишлаш.
Февраль ойида Байден глобал исишни “инсоният учун ядровий қуролдан ҳам ёмон экзистенциал таҳдид” деб билишини айтган.
Изоҳ (0)