Октябрь ойида Сурия жанубидаги Америка базасига дронлар ёрдамида уюштирилган ҳужум Эроннинг Сурия бўйлаб Исроил томонидан амалга оширилган авиазарбаларига жавоб тарзида амалга оширилган. Бу ҳақда The New York Times’га таяниб, «Интерфакс» хабар берди.
Нашрнинг ёзишича, 20 октябрь куни Сурия жанубидаги Американинг «Ат-Танф» ҳарбий базаси томон бешта учувчисиз бошқариладиган учиш аппарати учирилган. АҚШ Марказий қўмондонлиги буни «қасддан ва координациялашган» ҳужум деб атаган. АҚШнинг юқори мартабали ҳарбий амалдори газетага берган интервьюсида «аниқ ўлдириш ниятида» бўлган дронларнинг фақат иккитаси портлаганини маълум қилган.
Ҳужум оқибатида ҳеч кимга жароҳат етмаган, чунки базадаги 200 га яқин ходим Исроил разведкасининг ҳужумга тайёргарлик кўрилаётгани бўйича берган маълумотлари асосида эвакуация қилинган эди.
NYT’нинг қайд этишича, ҳужум Эрон бошчилигида Суриядаги кучлар томонидан амалга оширилган, бироқ Пентагон вакили «29 ноябрь куни ўтказиладиган Теҳроннинг ядровий битимга қайтиши борасидаги музокаралар барбод бўлмаслиги учун Эронни оммавий айблашдан бош тортган».
Эрон ушбу ҳужум бўйича масъулиятни зиммасига олмаган. «Улар ҳеч қандай далил ва ҳужжатсиз Эронни айблаган шунга ўхшаш бир қанча воқеалар бўлган», — деган эди Эрон ТИВ вакили Саид Хатибзода.
Шу билан бирга, нашр манбасининг таъкидлашича, АҚШ ва Исроил операция ортида Эрон турганини кўрсатувчи разведка маълумотларига эга. Учта учувчисиз бошқариладиган учиш аппарати портламагани сабаб америкаликлар уни ўрганган ва уларда Эрон томонидан Ироқда қўллаб-қувватланадиган жангарилар қўлловчи дронлардаги технологиядан фойдаланилганини аниқлаган.
Нашрнинг қайд этишича, «Эроннинг Исроил билан яширин урушининг кучайиши Яқин Шарқдаги Америка қўшинлари учун янги хавфларни келтириб чиқармоқда».
Аввалроқ Эрон Форс кўрфазида ҳарбий машғулотлар бошлагани, Жо Байден Эронга қарши 1979 йилда жорий этилган санкцияларни узайтиргани тўғрисида хабар берилганди.
Изоҳ (0)