3 февралга ўтар кечаси АҚШнинг Сурия шарқидаги ҳудудларга берган авиазарбалари оқибатида бир неча тинч аҳоли ҳамда ҳарбий хизматчилар ҳалок бўлди ва яраланди, деб хабар бермоқда SANA агентлиги мамлакат Мудофаа вазирлигига таяниб. Вазирлик қурбонларнинг сонига аниқлик киритмади.
Вазирлик маълумотларига кўра, бир қатор шаҳар ва объектлар ҳужумга учраган, бу эса “давлат ва хусусий мулкка” зарар етказган.
Бундан ташқари, Эроннинг Суриядаги элчихонаси маълумотларига кўра, 2 февраль, жума куни тонгда Эрон Ислом инқилоби посбонлари корпуси (ИИПК) маслаҳатчиларидан бири Саид Алидадий Дамашқ чеккасида берилган ҳаво ҳужумида ҳалок бўлган. Эрон дипломатлари ҳужумда Исроилни айблади. Исроил томони бу ҳақда ҳозирча изоҳ бермаган.
Ироқ Қуролли кучларининг расмий вакили Яҳё Расул мамлакат шарқидаги Ал-Қоим шаҳри ҳамда Ироқ ва Суриянинг чегарадош ҳудудлари ҳужумга учраганини маълум қилди, деб хабар бермоқда Эрон IRNA агентлиги. У АҚШнинг ҳаракатларини Ироқ суверенитетини бузиш деб атаб, бу минтақа барқарорлигига путур етказиши мумкинлигини таъкидлади.
“Ҳужумлар Ироқ учун жиддий таҳдид ва минтақа учун даҳшатли оқибатларга олиб келади”, — деди бош вазир Муҳаммад Шиа ал-Суданий идораси.
3 февралга ўтар кечаси Қўшма Штатлар Сурия ва Ироқдаги ИИПК ва унга қарашли милиция гуруҳлари объектларига ҳаводан зарбалар берди. 125 та снаряд ёрдамида 85 дан ортиқ нишонга зарба берилди, бунда кўп сонли самолётлар, шу жумладан, АҚШдаги базалардан узоқ масофага учувчи бомбардимончилар қўлланди. Қайд этилишича, нишонлар — оператив ва қўмондонлик марказлари, дрон ва ракеталар омборлари, разведка марказлари, логистика иншоотлари ҳамда Америка қўшинлари ва бошқа коалиция кучларига ҳужум қилишга ҳисса қўшган гуруҳларнинг таъминот занжирлари бўлган.
Изоҳ (0)