Сурия шимоли-шарқидаги мингга яқин Америка ҳарбийлари ИШИД террорчиларига қарши курашиш учун Ироқ ғарбига ўтказилади. Бу ҳақда 19 октябрь куни АҚШ мудофаа вазири Марк Эспер маълум қилган, дея хабар бермоқда Reuters.
«АҚШ қўшинлари Сурия шимоли-шарқидан чиқиб кетишда давом этмқода. Жараён бир неча кунда эмас, балки ҳафталар давомида амалга ошади. Жорий режа уларни Ироқнинг ғарбий қисмига кўчириб ўказишдан иборат», − дея таъкидлаган Пентагон раҳбари.
Эспернинг сўзларига кўра, ушбу ҳудуддан мингга яқин АҚШ ҳарбийлари Ироқ томонга кўчириб ўтказилади.
Туркия 9 октябрда Сурия шимоли-шарқида курд жангариларига қарши «Тинчлик булоғи» ҳарбий операциясини бошлаган. Ҳарбий ҳаракатлар давом этаётган вақтда Пентагон АҚШ ҳарбийларининг ушбу операцияда иштирок этмаслиги ва ҳудуддан эвакуация қилинишини билдирганди.
18 октябрь, жума куни Туркия президенти Ражаб Тоййиб Эрдўғон АҚШ вице-президенти Майк Пенс билан музокаралардан кейин Сурия шимоли-шарқидаги «Тинчлик булоғи» операциясини 120 соатга тўхтатилганлигини эълон қилганди. Анқара курдларнинг чегара ҳудудидан узоқлашишини ва оғир артиллерия воситаларини топширишини талаб қилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)