АҚШ Сурияда Фурот дарёсининг шарқида жойлашган нефть конларини ҳимоя қилувчи махсус бўлинма ташкил қила бошлади, деб хабар бермоқда Туркиянинг Anadolu агентлиги.
Қайд этилишича, махсус кучлар таркибидан аксарияти Курдистон ишчилар партияси (КИП) ва Мудофаа бўлинмаларига аъзо ҳисобланган Сурия демократик кучлари (СДК) жангчилари бўлган этник араблар ўрин олади. Туркия уларни террорчилик ташкилотлари деб ҳисоблайди.
Ушбу бўлинма нефть конларини ҳимоя қилишдан ташқари, Сурия президенти Башар Асад ҳокимиятини қўллаб-қувватлаган Эроннинг қуролли тузилмалар ҳужумларини қайтаришга тайёр туриши керак.
Агентликнинг таъкидлашича, ушбу вазифаларни бажарганлик учун Америка қўмондонлиги ҳар бир аскарга ойига 350 доллар тўлайди. Курдистон ишчилар партияси аъзолари ва СДК сафларидаги Курд мудофаа отрядлари аъзоларига эса атиги 100 доллардан берилади.
Шунингдек, махсус кучлар жангчилари Сурия—Ироқ чегараси яқинидаги Ҳасек вилоятида тайёргарликдан ўтиши маълум. Унга мингга яқин кишини жалб қилиш режалаштирилган бўлиб, улар тўғридан-тўғри Америка кучларига бўйсунади.
Аввалроқ Сурияда бензовоз портлаши оқибатида тинч аҳоли вакилларидан 40 нафари ҳалок бўлгани ҳақида хабар берилган эди.
Изоҳ (0)