Бирлашган Миллатлар Ташкилотининг Қочқинлар бўйича Олий комиссарлиги бошқармаси Тожикистондаги афғон қочқинлари билан боғлиқ вазиятдан жиддий хавотир билдирди — уларнинг аксарияти ҳибсга олиниб, депортация қилинмоқда, деб хабар беради «Интерфакс» БМТ сайтига таяниб.
«Тожикистон қочқинларни ҳибсга олиш ва депортация қилишни тўхтатиши керак — бу одамлар ҳаётига хавф туғдирадиган ҳаракатлардир», — деди БМТ Қочқинлар бўйича Олий комиссарлиги бошқармаси матбуот котиби Элизабет Тан. У қочқинларнинг мажбурий қайтарилиши қонунга ва қочқинлар бўйича халқаро ҳуқуқнинг асосий тамойилига зид эканини эслатди.
Бошқарма маълум қилишича, яқинда беш нафар афғоннинг депортацияси билан боғлиқ воқеа содир бўлган. Улар орасида уч болалаи она ҳам бор. БМТ Қочқинлар бўйича Олий комиссарлиги аралашувига қарамай, уларнинг барчаси 23 август куни Тожикистон шимоли-шарқидаги Панчи Поён чегара пункти орқали Афғонистонга мажбуран қайтарилган.
Ҳисоботда қайд этилишича, 2021 йилдан бери БМТ қочқинлар бўйича Олий комиссарлиги Тожикистонда қочқинларни ушлаб туриш, уларни мамлакатдан чиқариб юбориш ва халқаро ҳимояга муҳтож бўлганларнинг киришини тақиқлаш билан боғлиқ кўплаб ҳолатларни қайд этган.
2021 йил август ойида БМТнинг Қочқинлар бўйича олий комиссарлиги Афғонистон бўйича ўзининг универсал тавсияларини эълон қилганди. Ушбу қўлланма 2022 йил февраль ойида янгиланган. Ҳар икки ҳужжат ҳам барча давлатларни афғон фуқароларини мажбуран ортга қайтаришни тақиқлашга чақиради.
БМТ афғонлар Тожикистонда ҳимояга ҳамда адолатли ва самарали бошпана механизмидан фойдаланиш имкониятига эга бўлиши кераклигини таъкидлади. Уларнинг ўз ватанига мажбуран қайтиши халқаро ҳуқуқнинг жиддий бузилиши ҳисобланади.
«Биз доимий равишда Тожикистон ҳукуматини Афғонистондаги можаро ва таъқиблардан қочганларга республикага кириш ҳуқуқини беришга ва кейинги депортацияларни тўхтатишга чақирамиз», — дея қўшимча қилди Элизабет Тан. У Афғонистондаги аёллар ва қизлар ҳуқуқлари билан боғлиқ вазиятни эслади.
Изоҳ (0)