Америкалик сенатор Марко Рубио Бирлашган Миллатлар Ташкилоти орқали Афғонистонга молиявий ёрдам беришни тўхтатишга чақирди. Бу ҳақда Hasht-e Subh Daily хабар берди.
Сенаторнинг чақириғига “Толибон” халқаро ёрдамдан фойдаланаётгани бўйича хавотирлар сабаб бўлган. У инсонпарварлик ёрдами “террорчи гуруҳлар”ни кучайтириш учун ишлатилмаслиги таъминланмагунча, АҚШ Афғонистонга ёрдам ажратишни тўхтатиши кераклигини айтган.
“Аниқ билмагунимизча БМТга ёрдам беришдан воз кечишимиз керак”, — деган Марко Рубио.
У Вашингтон пулларини “Толибон” режимини мустаҳкамлашга сарфламаслик кераклигини хулоса қилган.
Аввалроқ АҚШ расмийлари “Толибон”нинг халқаро ҳамжамият, хусусан, АҚШдан келаётган инсонпарварлик ёрдамидан нотўғри фойдаланаётганидан хавотир билдирганди.
2023 йил АҚШнинг Афғонистонни қайта тиклаш бўйича махсус инспектори Жон Сопко “Толибон” ёрдамнинг катта қисмидан ўз манфаатлари йўлида фойдаланаётганини айтганди. Ўшанда у АҚШ сенатига саккиз бетлик ҳисобот тақдим этиб, “Толибон” АҚШ пулларидан фойда кўраётганини айтган.
“‘Толибон’ ҳукумати гуманитар ташкилотларига ўз одамларини ёллаш учун босим ўтказмоқда ва ҳатто лойиҳаларни амалга ошириш учун ҳудудларни танлашга аралашмоқда”, — деган Сопко.
Афғонистонни қайта тиклаш бўйича “CИГАР” ташкилотига кўра, АҚШ сўнгги икки йилда “Толибон” ҳукмронлиги остидаги Афғонистонга 11 миллиард доллардан ортиқ ёрдам кўрсатган.
Изоҳ (0)