Хитой раҳбари Си Цзиньпин глобал “Олимпия сулҳи”га эришишга чақирди. Хитой раҳбари ўз позициясини Парижда француз ҳамкасби Эммануэль Макрон билан ўтказган матбуот анжуманида билдирди. Бу ҳақда Reuters хабар берди.
“Дунё тинч эмас ва Бирлашган Миллатлар Ташкилоти Хавфсизлик кенгаши аъзоси сифатида Хитой Франция билан биргаликда Париждаги Олимпия ўйинлари муносабати билан бутун дунё бўйлаб сулҳ тузишга чақиради”, — деди Си Цзиньпин.
Франция президенти сулҳ ғоясини қўллаб-қувватлагани учун Хитой раисига миннатдорлик билдирди.
“Барча ҳарбий ҳаракатлардаги театрларда Олимпия сулҳи халқаро ҳуқуққа тўлиқ мос келадиган узоқ муддатли келишувга эришиш учун имконият бўлиши мумкин”, — деди у.
Макрон илк бор март ойида “Олимпия сулҳи”га эришиш режаларини эълон қилганди. Ўшанда у фақат Украинада ўт очишни тўхтатиш ҳақида гапирган. Апрель ойида Франция президенти Ғазо секторида сулҳга эришиш учун ҳам ҳаракат қилаётганини айтди.
Россия расмийлари ҳозирча тегишли таклифга муносабат билдирмаган. Президент Владимир Путин “ҳар қандай масалаларни Россия манфаатларидан ва жанговар алоқа зонасидаги вазиятдан келиб чиқиб” кўришга ваъда берган. Кремль матбуот котиби Дмитрий Песков Украина сулҳдан “қайта ҳарбийлар тўплаш, қайта қуролланиш ва шу кабилар” учун фойдаланиши мумкинлигини айтган.
Изоҳ (0)