Бирлашган Миллатлар Ташкилоти (БМТ) бош котиби Антониу Гутерриш Мьянма ҳарбийларини репрессияни тўхтатишга ва халқ иродасини қабул қилишга чақирди. У замонавий дунёда ҳокимиятни қурол билан эгаллаб олишга ўрин йўқлигини таъкидлади. Бу ҳақда «РИА Новости» хабар қилди.
«Бугун мен Мьянма ҳарбийларини репрессияни зудлик билан тугатишга чақираман. Маҳбусларни озод қилинг. Зўравонликка барҳам беринг. Сўнгги сайловларда ифода этилган инсон ҳуқуқлари ва халқ иродасини ҳурмат қилинг. Замонавий дунёда ҳокимиятнинг қурол билан эгаллаб олинишига ўрин йўқ», — деди у 22 февраль, душанба куни Женевада бўлиб ўтган БМТ Инсон ҳуқуқлари бўйича кенгаши 46-сессиясининг очилишида.
Унинг сўзларига кўра, ҳарбийларнинг хатти-ҳаракатлари демократияга путур етказади.
«Фуқаролик маконига чекловлар қўйиш, фуқаролик жамиятига қарши ҳужумлар, ҳеч қандай масъулиятни ўз ичига олмайдиган озчиликларга қарши жиддий қонунбузарликлар, жумладан, рохинжа халқининг этник тозаланиши — буларнинг барчаси бора-бора кучли бўронга айланмоқда», — дейди Гутерриш.
Шу муносабат билан бош котиб БМТнинг Инсон ҳуқуқлари бўйича кенгашининг февраль ойи ўрталарида қабул қилинган Мьянма бўйича «демократик йўл билан сайланган ҳукуматни тиклашни» талаб қиладиган қарорини мамнуният билан қабул қилди.
Маълумот учун, 1 февраль куни Мьянма ҳарбийлари мамлакатда ҳокимиятни қўлга киритганини эълон қилди, улар мамлакат президенти ва бошқа юқори мартабали амалдорларни 2020 йил 8 ноябрда бўлиб ўтган «сайловдаги фирибгарликлар»ни текширмаганликда айблаб, ҳибсга олди. Қуролли Кучлар бош қўмондони Мин Аунг Хлайн мамлакатнинг муваққат президенти этиб тайинланди ва мамлакатда бир йил муддатга фавқулодда ҳолат жорий этилди.
Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиқди. Мамлакатда оммавий норозилик ва иш ташлашлар бошлангач, Транспорт ва коммуникацияларни ривожлантириш вазирлиги 14 февраль, якшанба куни уяли алоқа операторларига интернетга киришни тақиқлашни буюрди. Натижада, 15 февраль куни эрталаб саккиз соат давомида тармоққа кириш имконсизлигича қолди. Аммо кейинчалик интернет алоқаси тикланди.
Мьянма ҳарбийлари намойишларга қарши мамлакатнинг энг йирик шаҳри Янгон кўчаларига зирҳли машиналарни киритган. Мамлакат Марказий банки ёнида аскарлар, зирҳли транспортёрлар, тартибсизликни назорат қилиш бўлинмалари ва сув пуркагичлари бўлган юк машиналари пайдо бўлган. Шунга қарамай, шаҳарнинг ушбу ҳудудида 1000 дан ортиқ намойишчилар тўпланган.
Аввалроқ ҳукумат тўнтарилиши пайтида ҳарбийлар томонидан ҳибсга олинган Мьянма президенти У Вин Мьинт президент саройидан бошқа бинога кўчирилгани ҳақида хабар берилганди. Хабарга кўра, унинг қаердалиги номаълум.
Шунингдек, тўнтариш вақтида ҳибсга олинган давлат маслаҳатчиси Аун Сан Су Чжига қарши 16 февраль куни иккинчи айблов эълон қилинган. Таъкидланишича, эндиликда Аун Сан Су Чжи фавқулодда вазиятлар тўғрисидаги қонунни бузганликда айбланмоқда. Биринчи марта 3 февраль куни давлат маслаҳатчиси импорт ва экспорт тўғрисидаги қонунни бузганликда айбланган эди.
Бундан аввал Шавкат Мирзиёев ҳам БМТнинг Инсон ҳуқуқлари бўйича сессиясида нутқ сўзлагани ҳақида хабар берилганди.
Изоҳ (0)