Хитой раҳбарияти 15 апрель куни Исроил расмийларига мурожаат қилиб, ўт очишни дарҳол тўхтатишга ва тинчликка эришишга чақирди. Бу ҳақда Anadolu нашри Яқин Шарқ манбаларига асосланиб, хабар берди.
Манбада айтилишича, Пекин расмийлари Исроил ва Эрон ҳужумларидан кейин Яқин Шарқда кескинлик кучайишидан хавотир билдирган. Масъулларни урушга етакловчи ҳар қандай хатти-ҳаракатни тўхтатишга чақирган.
Хитой Ташқи ишлар вазирлиги баёнотида айтилишича, душанба куни Хитойнинг Яқин Шарқ бўйича махсус вакили Чжай Жун Исроилнинг Хитойдаги элчиси Ирит Бен-Абба Витале билан учрашган. Унда Яқин Шарқ можароси юзасидан Хитойнинг нуқтаи назари тингланган.
“Томонлар Яқин Шарқдаги вазият юзасидан фикр алмашдилар. Кескинликни тугатиш борасида ўз мулоҳазаларини билдирдилар”, — дейилади расмий хабарда.
Ирит Бен-Абба Витале Хитой вакилини ўтган ҳафта охиридаги Эроннинг Исроилга қарши ҳарбий ҳужуми билан боғлиқ вазият билан таништирган. Ғазодаги можаро борасида Исроилнинг позицияси ва хавотирларини маълум қилган.
Ўз навбатида Хитой расмийси Чжай Хитойнинг Ғазо можароси бўйича позициясига батафсил тўхталиб, минтақавий тарангликнинг ҳозирги кучайиб бораётганидан чуқур хавотирда эканини айтган, можаролар ва қон тўкишлар ҳеч кимнинг манфаатига хизмат қилмаслигини таъкидлаган.
Учрашувда Хитой расмийси исроиллик ҳамкасбидан тинчликка эришиш учун барча ресурсларни сафарбар қилишни сўраган.
Изоҳ (0)