АҚШ Вакиллар палатасининг собиқ спикери Нэнси Пелоси Вашингтонни Исроилга қурол савдосини тўхтатишга чақирди. Бу ҳақда CNN нашри хабар берди.
Манбага кўра, Нэнси Пелоси демократларнинг Исроилга АҚШ қурол-яроғ савдосини тўхтатиш ҳақидаги чақириқларига қўшилганини билдирган. Сўнгги кунларда Ғазода гуманитар ёрдам ходимларига нисбатан ҳужумлар ва гуманитар вазият кескинлашиб бораётгани таъкидланган.
Президент Жо Байден ва давлат котиби Энтони Блинкенга йўллаган мактубида Пелоси ва бошқа ўнлаб демократлар Исроилнинг етти нафар гуманитар ходим ўлимига сабаб бўлган сўнгги ҳаво ҳужумини қоралаб, бу ҳолатдан қаттиқ ғазабда эканликларини билдиришган. АҚШни томонларни келиштиришда ирода кўрсатишга чақиришган.
“Ушбу воқеани ҳисобга олиб, биз сизни Исроилга янги қурол пакетини топширишга рухсат бериш ҳақидаги яқинда эълон қилинган қарорингизни қайта кўриб чиқишингизни ва ҳаво ҳужуми бўйича тўлиқ тергов тугагунига қадар ушбу ва ҳар қандай ҳужум қуролларини етказиб беришни тўхтатиб туришингизни қатъий талаб қиламиз”, — дейилади демократлар АҚШ раҳбариятига йўллаган талабномада.
Мактубда Байден маъмуриятининг сўнгги пайтларда Ғазога гуманитар ёрдам етказилишини оширишга қаратилган саъй-ҳаракатлари эътироф этилган. Бироқ улар тинч аҳоли эҳтиёжларини қондириш учун етарли эмаслиги ҳақида огоҳлантирилган.
Изоҳ (0)