АҚШ президенти Жо Байден Исроил бош вазири Биньямин Нетаньяхунинг Ғазо секторида уруш олиб боришга ёндашувини “хато” деб билишини айтди. Бу ҳақда у Univision телеканалига берган интервьюсида маълум қилди.
Байден Исроил ҳужуми оқибатида Ғазо секторида World Central Kitchen гуманитар ташкилотининг етти нафар кўнгиллиси ҳалок бўлганини “даҳшатли” деб атади.
“Менимча, унинг (Биньямин Нетаньяху) қилаётган иши хато. Мен бу ёндашувга қўшилмайман. Шунинг учун Исроилни ўт очишни тўхтатишга ва секторга олти-саккиз ҳафта ичида озиқ-овқат ва дори-дармонларга тўлиқ киришни таъминлашга чақираман”, — деди Байден Univision телеканалига берган интервьюсида.
Исроил 2 апрель куни World Central Китчен ходимлари бўлган карвонга ҳаводан зарба берди. Кўнгиллилар орасида Австралия, Буюк Британия, Польша, Фаластин фуқаролари, шунингдек, АҚШ ва Канада фуқаролигига эга шахс ҳам бор. Исроил армияси бош штаби раҳбари Герц Ҳалеви Исроил ҳарбийларининг зарбасини хато деб атади. World Central Kitchen ташкилоти карвоннинг йўналиши Исроил армияси билан олдиндан келишилганини маълум қилди.
5 апрель куни Жо Байден ва Бинямин телефон орқали 30 дақиқа суҳбатлашди. АҚШ президенти Исроил тактикасини ўзгартирмаса ва Ғазога гуманитар ёрдам етказилишини кенгайтирмаса, ҲАМАСга қарши урушни қўллаб-қувватлаш масаласини қайта кўриб чиқиш билан таҳдид қилди. Бир неча соат ўтгач, Исроил Ғазога кунига 500 тагача юк машинасини киритишга рухсат берувчи чораларни эълон қилди.
Изоҳ (0)