Яман ҳусийлари Исроилнинг иккита шаҳрига авиазарба берди

Яман ҳусийлари 12 июнь куни Исроилнинг Ашдод ва Ҳайфа шаҳарларига ҳаводан ҳужум уюштирган. Бу ҳақда Al Arabiya нашри хабар берди.

Манбада келтирилишича, ҳусийлар ҳужумига Ироқдаги “Исломий қаршилик ҳаракати” ҳам қўшилган. Икки гуруҳ Ашдод ва Ҳайфа шаҳарларидаги стратегик нуқталарга ҳужум уюштирган.

Исроил расмийлари ҳужум оқибатида етказилган зарар кўлами ҳақида маълумот тақдим этмаган. Ҳалок бўлган ва яраланган фуқаролар ҳақида ҳам маълумот мавжуд эмас.

Ҳусийлар, шунингдек, Қизил денгизда турган Исроил ҳарбий ташувчисига ҳам ракеталар отган. “Ансоруллоҳ” ҳаракати матбуот котиби Яҳё Сари ушбу хабарни тасдиқлаган.

Кема ҳужумдан кейин жиддий шикастланиб, чўкиш арафасида экани маълум қилинган. Ҳусийлар кемага ҳужумда учувчисиз қурилмалар, ҳаво дронлари ва баллистик ракеталардан фойдалангани айтилган.

Ҳужумга учраган кема Яманнинг Ҳудайда портидан 68 километр жануби-ғарбда тўхтаб қолган. Ундаги экипаж тезда эвакуация қилинган.