Туркия, Эрон, “Ҳизбуллоҳ” ва ҳусийлар Исроилга таҳдид қилди

ҲАМАС сиёсий бюроси раҳбари Исмоил Ҳания ўлдирилганидан кейин бир қатор давлатлар Исроилга таҳдид қилди. Бу ҳақда Bild хабар берди.

Эроннинг янги президенти Масъуд Пезешкиён ҲАМАС сиёсий етакчиси ўлдирилишини қоралаб, Эрон “ўзининг ҳудудий яхлитлигини ҳимоя қилишини” айтди. Теҳронда уч кунлик мотам эълон қилинди.

Шунингдек, у “террорчи босқинчилар ўзларининг қўрқоқлик ҳаракатларидан пушаймон бўлишларини” билдирди. Эрон олий раҳнамоси Али Хоманаий эса Ҳаниянинг ўлими учун Исроилга қарши “кескин жазо” Теҳроннинг бурчи эканини таъкидлади.

“Шаҳид Ҳания узоқ йиллар адолатли кураш майдонида ўзининг қимматли жонини ўз қўлига олиб, шаҳидликка тайёр бўлиб, бу йўлда фарзандларини, халқини қурбон қилди. У Аллоҳ йўлида шаҳид бўлиб, Аллоҳнинг бандаларини қутқаришдан қўрқмади, лекин Ислом республикаси ҳудудида содир бўлган воқеада унинг қони учун қасос олишни ўз бурчимиз деб биламиз”, деди у.

Яманнинг Ансор Аллоҳ (ҳусийлар) ҳаракати вакиллари ҳам Ҳаниянинг ўлдирилишига муносабат билдирди. Улар ҲАМАС етакчиларидан бирининг ўлдирилишини “даҳшатли террорчилик жинояти” ва “қонунларни қўпол равишда бузиш” эканини айтди.

“Ҳизбуллоҳ” Ҳаниянинг ўлдирилиши Исроилга қаршиликни кучайтиришидан огоҳлантирди. Фаластин президенти Маҳмуд Аббос эса суиқасдни кескин қоралаб, буни “қўрқоқлик ҳаракати ва хавфли воқеа” деб таърифлади, Президент, шунингдек, фаластинликларни бирлашишга ва “Исроил ишғолига қарши сабрли ҳамда собит бўлишга” чақирди.

Бундан ташқари, Туркия Ташқи ишлар вазирлиги ҳам расмий изоҳ берди. Вазирлик “Ҳаниянинг шармандали ўлдирилиши Ғазодаги урушни халқаро миқёсда кенгайтиришга қаратилгани”ни билдирди.

Исроил маданий мерос вазири Амикай Элияху, ўз навбатида, Ҳаниянинг ўлдирилишидан хурсандлигини яширмади.

“Бу дунёни ифлосликдан тозалашнинг энг тўғри йўли. Ҳаниянинг ўлими дунёни бир оз яхшилайди”, деб ёзган у Х ижтимоий тармоғида.