АҚШ ва Буюк Британия Ямандаги ҳусий объектларига зарбалар берди. Бу ҳақда Reuters америкалик расмийларга таяниб хабар берди. Гувоҳлар Яман пойтахти Санадаги портлашлар ҳақида маълум қилди.
CNN маълумотларига кўра, АҚШ зарбалар учун Tomahawk бомбардимончи самолётлари ва қанотли ракеталардан фойдаланмоқда. Телеканалнинг аниқлик киритишича, Америка ҳарбийлари ҳусийларнинг “кўплаб” нишонларига ҳужум қилган. Reuters агентлигининг ёзишича, зарбалар қирувчи самолётлар, кемалар ва сув ости кемаларидан йўлланган.
Яман ҳусийлари вакили АҚШ ва Британия зарбалари Яман пойтахти ҳамда Ходейда, Саада ва Дҳамар шаҳарларига берилганини маълум қилди, деб ёзади Тhе Guardian. АҚШ расмийсининг CNN телеканалига айтишича, АҚШ ва Буюк Британия ҳусийларнинг ўндан ортиқ нишонларига зарбалар берган. Нишонлар ҳусийларнинг Қизил денгиздаги кемаларга ҳужум қобилиятини қанчалик заифлаштириши мумкинлигига қараб танланган.
Тhе Guardian, Тhе Тimes ва WSJ нашрлари хабарига кўра, Вашингтон ва Лондон бундай операция тўғрисидаги қарорни Қизил денгиздан ўтаётган кемаларга Эрон томонидан қўллаб-қувватланган ҳусийларнинг давомли ҳужумлари сабаб қабул қилган.
Зарбалар бошланганидан тахминан бир соат ўтиб, АҚШ президенти Жо Байден баёнот билан чиқди.
“Бугун менинг буйруғимга биноан АҚШ кучлари Буюк Британия билан биргаликда Австралия, Баҳрайн, Канада ва Нидерландия кўмагида Ямандаги қатор объектларга зарба беришди. Ҳусий исёнчилари бу объектлардан дунёдаги энг муҳим юк ташиш йўлларидан бирида навигация эркинлигига таҳдид солиш учун фойдаланган. Ушбу зарбалар ҳусийларнинг Қизил денгиздаги халқаро кемаларга мисли кўрилмаган ҳужумларига, жумладан, тарихда биринчи марта кемага қарши баллистик ракеталардан фойдаланганига бевосита жавобдир”, —деди Америка президенти.
Байден ҳусийларга қарши зарбаларни “мудофаа ҳаракати” деб атади.
10 январь куни Буюк Британия Мудофаа вазирлиги Британия флоти эсминецлари Америка кемалари билан биргаликда Яманнинг “Ансор Аллоҳ” ҳусий ҳаракатининг Қизил денгиздаги энг йирик ҳужумини қайтарганини маълум қилди. Ҳусийларнинг ракета ва Эрон дронлари ёрдамида амалга оширилган ҳужуми 9 январь куни кечқурун бошланган. АҚШ Марказий қўмондонлигининг таъкидлашича, АҚШ авиаташувчилари Британия эсминеци билан бирга 18 та дрон, иккита кемага қарши қанотли ракета ва битта кемага қарши баллистик ракетани уриб туширган.
Ҳусийлар етакчиси Ямандаги ҳужумга жавоб қайтариш билан таҳдид қилди.
“Американинг ҳар қандай ҳужуми жавобсиз қолмайди. Жавоб 20 та дрон ва бир нечта ракеталар ёрдамида амалга оширилган ҳужумдан кўра каттароқ бўлади”, — деди Эрон томонидан қўллаб-қувватланадиган Яманнинг шимолий ва ғарбий қисмини назорат қилувчи гуруҳ раҳбари Абдул-Малик ал-Ҳусий.
Изоҳ (0)