Филиппин ҳарбий-денгиз кучлари 20 июнь куни 175 миллион доллар миқдоридаги гиёҳванд моддаларнинг ноқонуний партиясини қўлга олди. Бу ҳақда Arab News хабар берди.
Бу мамлакатдаги энг йирик гиёҳванд моддалар контрабандаси деб айтилмоқда. Бир жуфт ҳарбий-денгиз қайиқлари тонгга яқин Лусон ороли қирғоқларида 1,5 тонна метамфетамин гидрохлорид олиб кетаётган балиқ овлаш кемасини тутиб олган. Филиппин гиёҳванд моддаларга қарши кураш агентлиги билан ҳамкорликда ўтказилган тезкор тадбирда 4 киши, жумладан, бир нафар хорижлик қўлга олинган.
“Бизда ҳалигача гиёҳванд моддалар қаердан келгани ҳақида маълумотлар йўқ. Бу Филиппин ҳарбий-денгиз кучлари тарихидаги энг йирик ноқонуний гиёҳванд моддаларни қўлга олишдир”, дейилади полиция баёнотида.
Юклар каттароқ кемадан балиқ овлаш кемасига ўтказилгани ҳақида тахминлар борлиги айтилган. Маҳаллий аҳоли орасида “шабу” номи билан танилган метамфетамин гидрохлорид Филиппинда энг кенг тарқалган ноқонуний дори ҳисобланади. Июнь ойининг бошида шу ҳудуднинг шимолида катта миқдордаги гиёҳванд моддалар оқиб кетгани аниқланганди.
Филиппин тарихидаги энг йирик гиёҳванд моддалар мусодара қилиниши 2024 йилнинг апрель ойида содир бўлганди. Ўшанда пойтахт жанубидаги Батангас провинциясидаги йўлда жойлашган полиция назорат пунктида 2 тоннадан ортиқ метамфетамин мусодара қилинган эди.
Изоҳ (0)