28 апрелга ўтар кечаси Афғонистондан Тожикистон ҳудудига ўтмоқчи бўлган контрабандачилар билан отишмада тожикистонлик ҳарбий хизматчи ҳалок бўлди. Бу ҳақда Тожикистон Миллий хавфсизлик давлат қўмитасининг (МХДҚ) “Хоруғ” чегара отряди матбуот марказига таяниб, “Ховар” давлат ахборот агентлиги хабар берди.
Хабарга кўра контрабандачилар 8 кишидан иборат бўлган, улар ўта йирик ҳажмдаги наркотик моддалар, шунингдек, қурол-яроғ ва ўқ-дориларни олиб ўтиш мақсадида чегарани кесиб ўтмоқчи бўлган.
Контрабандачилар тожик чегарачиларининг таслим бўлиш ҳақидаги буйруғига бўйсунмай, ўт очган, сўнг воқеа жойида гиёҳванд моддалар, қурол ва ўқ-дориларни қолдириб, Афғонистон ҳудудига қочиб кетган.
Ҳодиса жойида афғон контрабандачиларининг уч шериги қўлга олинган: улар Тожикистон фуқаролари экани аниқланган.
Отишма жойидан 45 кг героин, тўрт дона Калашников автомати, 74 дона патрон, тунги кўриш мосламаси ва 10 минг доллар топилган.
“Озоди” радиоси хабарига кўра, ҳалок бўлган ҳарбий Тожикистон Миллий хавфсизлик давлат қўмитасининг Хоруғ шаҳар бошқармаси бошлиғи Комрон Ражабзода эди. Бироқ расмий баёнотда марҳумнинг шахси ҳақида ҳеч қандай маълумот йўқ.
Аввалроқ Тожикистон хавфсизлик кучлари Афғонистондан Тожикистонга ноқонуний ўтмоқчи бўлган икки қуролли жангарини отиб ўлдиргани ҳақида хабар берилганди. МХДҚ маълумотларига кўра, ҳалок бўлганлар Тожикистон ҳудудида теракт уюштиришни режалаштирган.
Изоҳ (0)