Россия Украинадаги уруш учун Ироқдан эронлик контрабандачилар ёрдамида қурол ва ўқ-дорилар олган, деб хабар беради The Guardian. Нашрга бу ҳақда Ироқ халқ сафарбарлик кучлари ва минтақавий разведка хизматининг исмини ошкор этмаган вакиллари маълум қилган.
Қуролларни ташишни ташкиллаштиришга ёрдам берган манбанинг маълум қилишича, Эрон Россияга «Бавар 373» зенит-ракета мажмуаларини топширган, шунингдек, олдинроқ Теҳрон Москвадан сотиб олган «C-300» зенит-ракета мажмуаларини қайтариб берган.
25 мартда Ироқ халқ сафарбарлик кучларининг битта бўлинмаси Ироқдан Эронга қўлбола гранатомётлар ва танкка қарши ракеталарни юборган. Ташувларни чегара орқали амалга оширишга маъсул бўлган бўлинма командирининг таъкидлашича, эронлик ҳарбийлар юкни денгиз орқали Россияга жўнатган. 1 апрель куни Халқ сафарбарлик кучларининг Эрондаги вакиллари Бразилияда ишлаб чиқарилган иккита Астрос II реактив залп ўт очиш тизимини юборган.
The Guardian маълумотларига кўра, ўша кунлари ҳарбий юкларни ташишга қодир учта кема Каспий денгизини Эроннинг Бендер-Энзели шаҳридан кесиб ўтиб, Россиянинг Астаханига борган. Кемалардан бири Эрон, иккитаси Россия байроғи остида ҳаракатланган.
4 апрель куни Украина Мудофаа вазирлиги Россия Грузия ҳудудидан санкцияга учраган товарларни, хусусан, ҳарбий мақсадларга мўлжалланган юкларни контрабанда орқали олиб киришда фойдаланаётганини маълум қилганди. Идора маълумотларига кўра, Грузия махсус хизматлари контрабандачиларга тўсқинлик қилмаслик бўйича кўрсатма берган. Мамлакат ҳукумати буни рад этмоқда.
Эслатиб ўтамиз, март ойида Россия ҳукумати Хитойдан ҳарбий техникалар тақдим этишини сўраганди. Оқ уй Хитой ҳукуматини урушда Россияни моддий қўллаб-қувватлашнинг оқибатлари ҳақида огоҳлантирган.
Изоҳ (0)