Тошкент шаҳрида божхоначилар томонидан ноқонуний муомаладан олиб қўйилган 34 минг 200 қути тамаки маҳсулотларини йўқ қилиш тадбири ўтказилди.
Тадбирда Давлат божхона қўмитаси, экология, санитария-эпидемиология, МИБ ва ОАВ вакиллари иштирок этди. Маълум қилинишича, ёқиб юборилган тамаки маҳсулотларининг умумий қиймати 297 миллион 400 минг сўмга тенг.
Давлат божхона қўмитаси ахборот хизмати раҳбари Ҳусан Тангриев йўқ қилинган тамаки маҳсулотлари Тошкент шаҳри ва Тошкент вилояти ҳудудида 4 та ҳолатда ноқонуний муомаладан олиб қўйилганини айтди.
«Жумладан, 2022 йил 30 март куни олдиндан кузатувга олинган шахс бошқарувидаги юк автотранспорт воситаси Зангиота тумани ҳудудида тўхтатилиб кўздан кечирилганида, юкхонада хорижда ишлаб чиқарилган ва рақамли маркировка кодларига эга бўлмаган, қиймати 63 миллион сўмлик 7 минг қути тамаки маҳсулотлари борлиги аниқланди.
Фото: «Дарё»
2022 йил 20 ва 27 апрель кунлари пойтахтимизнинг Чилонзор туманида ўтказилган тезкор тадбирларда аввалдан кузатувга олинган шахслардан бири муқаддам ноқонуний йўллар билан олиб кирилган ва сифати кафолатланмаган, қиймати 82 миллион 100 минг сўмлик 8 минг 600 қути, яна бир шахс эса 61 миллион 300 минг сўмлик 5 минг 600 қути тамаки маҳсулотларини юк машиналарига ортаётган вақтида тўхтатиб қолинди.
2022 йил 21 июль куни Тошкент вилояти божхоначилари томонидан аниқланган навбатдаги ҳолатда эса божхона ходимларини чалғитиш мақсадида қиймати 91 миллион сўмлик 4 турдаги 13 минг қути тамаки маҳсулотлари юк машинасидаги ёғоч эшик ромлари орасига моҳирлик билан яширилгани фош қилинди», – деди мутахассис.
Маълум қилинишича, 2022 йил 22 ноябрь ҳолатига кўра, Ўзбекистон божхоначилари томонидан ҳуқуқни муҳофаза қилувчи турли идоралар билан ҳамкорликда аниқланган 314 та ҳуқуқбузарлик ҳолатларида қиймати 19 миллиард 200 миллион сўмлик 1 миллион 578 минг 346 қути ноқонуний тамаки маҳсулотлари ушлаб қолинган. Аниқланган ҳолатларининг 71 таси бўйича жиноят ишлари қўзғатилган. 2021 йилнинг шу даврида эса 128 та ҳолат аниқланган ва 17 миллиард 500 миллион сўмлик 1 миллион 449 минг 305 қути ноқонуний тамаки маҳсулотлари муомаласига чек қўйилган. Ўтган йилнинг мос даврига нисбатан солиштирилганда, мусодара қилинган контрабанда тамаки маҳсулотлари ҳажми 9 фоизга кўпайган.
Изоҳ (0)