Россия президенти Владимир Путин АҚШда гиёҳванд моддалар контрабандасида айбланиб 20 йилга озодликдан маҳрум этилган учувчи Константин Ярошенкони Россия Жамоатчилик палатаси таркибига киритди. Путиннинг фармонида Ярошенко «ҳуқуқ ҳимоячиси ва жамоат арбоби» деб аталади.
Константин Ярошенко Африка мамлакатларига самолётда йўловчи ва юк ташиш билан шуғулланган. 2010 йилда у Либерияда ҳибсга олинган ва кейин АҚШга экстрадиция қилинган. Тергов маълумотларига кўра, Ярошенко Лотин Америкасидан Либерия орқали АҚШга бир неча тонна кокаин етказиб беришни режалаштирган.
Ярошенко ўз айбини тан олмаган. 2011 йилда у гиёҳванд моддаларни контрабанда қилишда айбдор деб топилиб, 20 йиллик қамоқ жазосига ҳукм қилинган. 2022 йилнинг апрель ойи охирида Ярошенко америкалик талаба Тревор Ридга алмаштирилди — Рид Россияда полициячиларга ҳужум қилгани учун 9 йилга озодликдан маҳрум этилган эди.
2022 йил май ойида Ярошенко Россияда жамоат ишлари билан шуғулланишни режалаштираётганини эълон қилди. «Ҳозир шундай кайфиятдаманки, менинг барча билимларим, кўникмаларим Россия жамоат ҳаётида америкаликлар аслида қандайлигини кўрсатиш учун фойда бериши мумкин», — деди у.
Россия ва АҚШ бошқа маҳбусларни алмашиш бўйича музокаралар олиб бормоқда. ОАВ маълумотларига кўра, июль ойи охирида АҚШ президенти Жо Байден маъмурияти Россияга тадбиркор Виктор Бутни америкалик собиқ полициячи Пол Уилан ва баскетболчи Бриттни Гринерга алмаштиришни таклиф қилган.
Изоҳ (0)