АҚШ ва Европа расмийлари Украина ҳукумати билан Киев ва Москва ўртасида эҳтимолий тинчлик музокаралари ўтказиш масаласини муҳокама қила бошлади. Бу ҳақда NBC News мунозаралар билан таниш бўлган америкалик амалдорларга таяниб хабар берди.
Журналистлар билан суҳбатлашган амалдаги ва собиқ мулозимларнинг айтишича, муҳокамалар Киев келишувга эришиш учун нималардан воз кечиши мумкинлиги ҳақида умумий тафсилотлардан иборат. NBC News манбалари нозик деб таърифлаган ушбу муҳокамаларнинг баъзилари октябрь ойида Рамштейн мудофаа алоқа гуруҳи йиғилишида бўлиб ўтган.
Киев билан музокаралар АҚШ ва Европа расмийларининг уруш боши берк кўчага кириб қолгани ҳақидаги хавотирлари ҳамда Украинага ёрдам кўрсатишни давом эттира олишига шубҳалари фонида ўтказилмоқда.
Бундан ташқари АҚШ президенти Жо Байден маъмурияти Украинанинг аҳолини ҳарбий хизматга чақиришда қийналаётганидан хавотирда. Қолаверса, Россиянинг Украинага бостириб кириши жамоатчилик эътиборини Яқин Шарқдаги можарога қараганда анча кам тортганди, расмийлар фикрича, бу Киевга қўшимча ёрдам ажратилишига таъсир қилиши мумкин.
NBC News манбалари Ғарб расмийлари ва Киев ўртасида тинчлик музокаралари бўйича фаол муҳокамалар йил охири ёки 2024 йил бошида бошланишини кутмоқда. Владимир Зеленскийни музокараларни бошлашга кўндириш учун НАТО Украинага, ҳатто мамлакат альянсга расман қўшилмаганда ҳам, баъзи хавфсизлик кафолатларини таклиф қилиши мумкин.
Шу билан бирга, Байден маъмурияти Россия президенти Владимир Путин Украина билан музокараларга тайёр эмас, деб ҳисоблайди. Америкалик расмийлар Киев иттифоқчилари уни қўллаб-қувватлаш имкониятидан маҳрум бўлганида ҳам урушни давом эттиришини кутмоқда.
АҚШ Миллий хавфсизлик кенгаши матбуот котиби Адриэн Уоцон музокаралар бўйича ҳар қандай қарор Украинага боғлиқлигини айтди.
“Биз Украинани унинг эркинлиги ва мустақиллигини Россия агрессиясидан ҳимоя қилган ҳолда қаттиқ қўллаб-қувватлашда давом этишга эътибор қаратяпмиз”, — дея қўшимча қилди у.
Можарони ҳал қилиш бўйича Россия — Украина музокаралари 2022 йилнинг февраль март ойларида бўлиб ўтган, бироқ апрель ойида Россия ишғоли остида бўлган Бучада тинч аҳоли қирғин қилингани маълум бўлгач, музокаралар музлатиб қўйилганди.
Украина расмийлари Россия билан урушни рус қўшинлари барча босиб олинган ҳудудлардан, жумладан Қрим ва Донбассдан чиқиб кетганидан кейингина тугатиши мумкинлигини бир неча бор таъкидлаган.
Ўз навбатида, Россия вакиллари Киев билан музокараларга тайёр эканини маълум қилган. Шу билан бирга, улар Украина томони муҳокамалардан бош тортаётганини таъкидлаган ва Киевни можаро бошида музокараларни тўхтатганликда айблаган.
Изоҳ (0)