Ўзбекистонда саратонга чалинган болалар 100 фоиз ихтисослаштирилган тиббий ёрдам билан қамраб олинади. Президент қарори билан 2025—2030 йилларда Ўзбекистонда болалар саратонига қарши курашишнинг асосий мақсадлари белгиланди.
“2025—2030 йилларда болалар саратонига қарши курашиш бўйича Ўзбекистон Республикаси миллий стратегиясини амалга ошириш чора-тадбирлари тўғрисида”ги қарорга кўра,
- болалар саратонини эрта босқичларда аниқлаш ҳолатлари улушини 65 фоизгача ошириш;
- онкологик ва онкогематологик касалликларга чалинган болаларнинг 1 йиллик яшовчанлигини 34 фоиздан 90 фоизгача, 5 йиллик яшовчанлигини эса камида 60 фоизгача ошириш ҳам мақсад қилинган.
2025—2030 йилларда болалар саратонига қарши курашиш бўйича Ўзбекистон миллий стратегияси ишлаб чиқилганди. Фармон билан 2025—2026 йилларда болалар саратонига қарши курашиш бўйича Ўзбекистон миллий стратегиясини амалга ошириш бўйича комплекс чора-тадбирлар дастури тасдиқланди.
Стратегияни жорий этиш лойиҳаси 2025—2026 йилларда Самарқанд шаҳри ва Иштихон туманидаги тиббиёт муассасалари базасида амалга оширилади ҳамда келгусида зарур шарт-шароитлар яратилишига қараб мамлакатнинг бошқа ҳудудларига параллел равишда кенгайтирилади.
Қарорга кўра, 2025 йил 1 июлгача “Электрон соғлиқни сақлаш” ахборот тизимида онкологик ва онкогематологик касалликларга чалинган болаларни рўйхатга олиш, ташхислаш, даволаш, диспансер кузатуви ҳамда йўналтириш жараёнларини ўз ичига олган беморларнинг рақамлаштирилган маршрути жорий этилади. Бунда шифокор қабулига масофадан ёзилиш ҳамда онлайн консултациялар ўтказиш имконияти яратилади.
2025 йил якунигача Стратегияни жорий этиш лойиҳасини амалга ошириш доирасида сунъий интеллект технологиялари жорий этилади.
Болалар онкологияси, гематологияси ва иммунологияси илмий-амалий тиббиёт маркази ҳузурида Болалар саратони бўйича халқаро академик хаб ташкил этилади.
Академик хаб илмий-таълим муассасаси ҳисобланади ҳамда унга қуйидаги асосий вазифалар юклатилади:
- халқаро сертификатлаштириш ва узлуксиз тиббий таълим тизими бўйича баллар тўплаш стандартларига мос келадиган халқаро таълим дастурларини жорий этиш;
- стратегик режалаштириш ва профилактик чора-тадбирлар ишлаб чиқиш учун болалар саратони билан касалланишнинг эпидемиологик тенденцияларини таҳлил қилиш ва прогнозлаш.
Шавкат Мирзиёев раислигида 7 май куни бўлиб ўтган видеоселектор йиғилишида ушбу академик хаб Марказий Осиёда ягона бўлиши айтилганди. Президент жойлардаги болалар шифохоналарининг онко-гематология бўлимларини касалликни эрта босқичда аниқлайдиган энг замонавий ускуналар билан жиҳозлашни топширганди.
Изоҳ (0)