Рақобатни ривожлантириш ва истеъмолчилар ҳуқуқларини ҳимоя қилиш қўмитаси хорижда ишлаш ва ўқиш учун “осон” боришни ваъда қилаётган консалтинг фирмалардан огоҳ бўлишга чақирди.
Маълум қилинишича, 2025 йилда фуқаролардан алдамчи консалтинг фирмалари бўйича 20 га яқин мурожаат келиб тушган бўлиб, уларнинг кўпчилиги хорижда ишга ёки ўқишга жойлаштириш ваъдаси билан фирмаларга пул тўлаган, аммо тўланган маблағлар қайтарилмаган ёки хизматлар бажарилмаганини билдирмоқда.
Хусусан:
- Тошкент шаҳридаги “Консалтинг Н1 B2B” МЧЖга 16 миллион сўмдан ортиқ тўлов қилган А.Б.нинг Латвияга ишга юбориш масаласи бўйича;
- Фарғона шаҳрида яшовчи фуқаро Ш.М.нинг Латвияда иш топиш ва виза расмийлаштириб бериш учун Қўқондаги Vivaт Viz МЧЖга жами 2000 доллар эквиваленти миқдорида пул тўлагани тўғрисида;
- Тошкент вилояти Янгийўл туманидаги фуқаро О.Х. Германияга ишлашга бориш мақсадида Яккасарой туманидаги Black Mountain Pro МЧЖга 36 миллион сўм тўлаган. Бироқ, фирма фаолиятини юритмаётгани, хизматлар бажарилмагани ҳамда пуллар қайтарилмагани тўғрисида ва бошқа мурожаатлар келиб тушган.
“Хусусий бандлик агентликлари тўғрисида”ги қонунга мувофиқ, хорижда ишга жойлаштириш хизмати фақат лицензияга эга агентликлар томонидан амалга оширилиши мумкин. Аммо кўпгина фирмалар бу қоидага амал қилмайди. Жумладан, Diamond Ideal, “Хорижда иш ва ўқиш”, СJ Теаm, Consulting FLY, Asia Consult Edugately, Euro Asia consulting centre, Exclusive assistant, DOCH Consult, Global consulting effort ва Poland business support and visa МЧЖлар каби консалтинг фирмалари ижтимоий тармоқлар орқали фуқароларни ишончига кириб, уларга хорижга ишга ёки ўқишга юборишни ваъда қилиб, пул олган, аммо уларнинг хизматлари бажарилмаган.
Қайд этилишича, бундай фирмаларнинг кўпчилиги лицензияга эга эмас ва уларнинг фаолияти қонуний эмас.
Шунингдек, Европанинг Ирландия, Англия, Дания, Норвегия каби давлатларига ишга юбориш тўғрисида эълонлар бериб, фуқароларга консалтинг хизматлари эмас, айнан хорижга ишга жойлаштириш бўйича хизматларни кўрсатиш билан шуғулланиб келаётган Эверёне cонсулт ва Worldviza МЧЖларга Миграция агентлиги томонидан БҲМнинг 300 баравари (112,5 миллион сўм) миқдорида жарима қўлланилган. Rich Result, Ravon Consult Group ва Adworld Group МЧЖ каби фирмаларга нисбатан ҳам ҳуқуқий чоралар кўрилган.
“Хорижда ўқиш ва ишлаш ниятида бўлсангиз, ҳар қандай ўртакаш фирмалар алдовларига ишонманг, улар фаолияти қонунийлигини ва лицензияси мавжудлигини текширинг” дейилади қўмита хабарида.
Уларнинг лицензиялари бор-йўқлигини Адлия вазирлиги сайтидаги реестрдан текшириш мумкин.
Қўмита юқоридаги каби вазиятларга тушиб қолмаслик учун шартнома шартлари билан батафсил танишиб чиқишга, унинг хизматига пул тўлашдан аввал алдов ва фирибгарлик қурбони бўлиб қолмасликка тўлиқ ишонч ҳосил қилишга чақирди.
Изоҳ (0)