Ёшлар орасида хориж тилларини ўрганишга интилаётганлар кўп. Хориж тилини билиш ўқиш, ишда ҳатто саёҳатларда ҳам қўл келади. Фахр билан айтоламизки, хорижда ўзбек тилини билишга интилаётганлар кўп. “Дарё”нинг навбатдаги қаҳрамонлари эса ўзбек миллатига мансуб эмас. Аммо ўзбек тилини ўрганишга жиддий аҳд қилишган ва бунинг уддасидан чиқишган.
Жо Сун Же: “Корейсларга ўзбек тилини ўрганишни тавсия қиламан”
Профессор Жо Сун Же Жанубий Корея фуқароси. У Тошкентда яшаб, ўқитувчилик қилмоқда.
— Аввал ҳам Ўзбекистонга иш бўйича келганман. Ундан кейин Жанубий Кореяга қайтдим. Тошкентдан иш таклиф қилишганидан кейин оилам билан кўчиб келдик. Беш йилдан буён Тошкентда яшаймиз. Бошида рус тилини ҳам ўрганмоқчи бўлдим. Аммо корейсларга рус тилини ўрганиш бир оз қийинчилик туғдиради. Шу боис ўзбек тилини ўрганишга қарор қилдим. Корейс ва ўзбек тиллари бир-бирига жуда ўхшайди.
Аввалига икки йил ўзбек тили ўқитувчисига қатнадим. Аммо у корейс тилини билмасди ва бир-биримизни тушунишимиз жуда қийин эди. Шундай кейин ўзбек киноларини кўришни бошладим, кўча-кўйда одамларни суҳбатга тортаман. Мулоқот жараёнида тилни ўрганиш осон.
Аёлим иккимизга Ўзбекистоннинг об-ҳавоси жуда ёқди. Ёзда ҳам Кореяга бориб келдим, жуда намгарчилик, ёмғир кўп ёғади. Бунинг устига Ўзбекистон бозорларида мева-сабзавотлар жуда арзон. Кореяда булар жуда қиммат. Ўзбек паловини жуда яхши кўраман. Аёлим уни пиширишга ҳаракат қилиб кўрди, аммо унчалик яхши чиқмади.
Дунёда хунук тилнинг ўзи йўқ, ўзбек тили ҳам жуда гўзал. Мен барча корейсларга уни ўрганишни тавсия қиламан, — дейди филолог Жо Сун Же.
Принсесса Раҳматова: “Ўзбекча гапиришни Бухорода ўрганганман”
Принсесса Раҳматованинг отаси Иброҳим Рурумеш асли кениялик бўлган. Аммо афроамерикалик қизнинг болалик йиллари Бухоро шаҳрида ўтган.
— Ота-онам АҚШда танишиб, оила қуришган. Онам томондан бувимнинг қариндошлари Бухорода яшагани учун бу ерларга келганмиз. Акам иккимизга бу ерлар ёқиб қолгани учун бир муддат шу ерда яшаганмиз. Дадам эса иши бўйича Калифорнияга кўчиб ўтган. Аммо уни кўриш учун тез-тез саёҳатга чиқардик. Онам бизни рус мактабига берган, аммо у ерда ҳамма ўзбек тилида гаплашарди. Қўшимчасига кўча-кўйда форс-тожик тилларида мулоқот қилишарди. Шу боис биз бир вақтнинг ўзида учта тилни ўрганишимизга тўғри келган. Ҳозирги кунда оиламизда инглиз, рус, форс-тожик, араб тилларида мулоқот қилинади. Аммо улар орасида ҳеч бири ўзбек тилидек ҳурматни биринчи ўринга қўймайди. Менимча сиз деб мурожаат қилиш фақат ўзбек тилига хос бўлса керак, — дейди Принсесса Раҳматова.
Рамзан Али: “Келаси интервьюгача ўзбекчани зўр ўрганаман”
Рамзан Али Покистон Республикасида туғилган. У она тилидан ташқари, инглиз тилида ҳам эркин мулоқот қилолади. Ёш профессор айни кунларда ўзбекистонлик талабаларга IT мутахассислиги бўйича сабоқ беради. У дарсларни инглиз тилида олиб борса-да, ўзбек тилини ўрганишга жиддий аҳд қилган.
— Асли покистонликман, Тошкентга ишга таклиф қилиб, инглиз тилида дарс ўтишимни айтишган. Аммо ўзбек тилига қизиқиб қолдим. Ҳозир ўзбек тилини ўрганяпман. Иншаоллоҳ, келаси интервьюга қадар бу тилни яхшироқ ўрганаман. Дарсдан кейин талабалар билан ўзбек тилида гаплашаман. Улар инглиз тилида гаплашишга интилади, менга эса ўзбек тили ҳам жуда қизиқ, — дейди профессор Рамзан Али.
Омар-Мун Ясмина: “13 ёшимдан буён ўзбек тилини ўрганаман”
Асли корейс миллатига мансуб бўлган Омар-Мун Ясмина нафақат ўзбек тилини билиши, балки мумтоз қўшиқларни ўрганиши билан ҳам ҳайратингизни ошириши аниқ.
— Миллатим корейс, ўзбек тилини бир оз тушунсам ҳам 13 ёшимга қадар бу тилда гапиролмасдим. Мумтоз қўшиқларга меҳрим уйғонгач, ўзбек тилини ўрганишга ҳам жиддий аҳд қилдим. Ўзбек тили буюк алломаларнинг тили ҳисобланади. Бу тилда янграётган қўшиқлар ҳам жуда гўзал. Бу юртда яшаётганимдан ва ўзбек мумтоз қўшиқларини ижро этаётганимдан ҳамиша фахрланаман, — дейди корейс қизи Омар-Мун Ясмина.
Сир эмаски, ҳозирги ёшларнинг аксарияти соф ўзбек тилида мулоқот қилмайди. Мулоқот жараёнида ўзбекчага қўшиб, рус ва инглиз сўзларини ҳам қўшиб гаплашишади. Хориж тилини билган яхши, аммо бу ўзбек тилини бузиб гапириш керак дегани эмас. Хорижлик инсонлар ўзбек тилининг нақадар гўзал эканлигини такрор-такрор айтишди. Афсуски, кўп ҳолларда ўзимиз миллат тилини қадрламаётганимиз жуда ачинарли.
Видеони тўлиқ ҳолда томоша қилишингиз мумкин:
Наргиза Муродова суҳбатлашди
Изоҳ (0)