Қонунчилик палатасининг 24 июндаги мажлисида ижтимоий ҳимояни таъминлаш ҳамда ижтимоий иш соҳасидаги муносабатларни тартибга солишга қаратилган “Ижтимоий иш тўғрисида”ги қонун лойиҳаси биринчи ўқишда кўриб чиқилиб, қабул қилинди.
Мажлисда таъкидланишича, ижтимоий ишни ташкил этиш ва ижтимоий қўллаб-қувватлаш борасида аҳолининг эҳтиёжманд қатламларига ижтимоий хизматлар кўрсатиш тизими яратилган бўлса-да, ижтимоий иш соҳасидаги муносабатларни қонун даражасида тартибга солиш зарурати юзага келмоқда. Шу сабабли ижтимоий ҳимояни таъминлаш ҳамда ижтимоий иш соҳасидаги муносабатларни тартибга солишга қаратилган янги ва яхлит қонун қабул қилиниши таклиф этилмоқда.
Ушбу қонун лойиҳасида ижтимоий иш соҳасидаги давлат сиёсатининг асосий принциплари, ижтимоий иш ташкил этиладиган соҳалар, ижтимоий ишни ташкил этишда идоралараро ҳамкорлик, ижтимоий ходимнинг мақоми, вазифалари ва мажбуриятлари ҳамда махсус ваколатли давлат органи ва унинг ваколатлари белгиланмоқда.
Шунингдек, ижтимоий ҳимояга муҳтож оила (шахс)ни аниқлаш ва уларни ижтимоий ҳимояга муҳтож оила (шахс) деб топиш асослари, ижтимоий хизмат ва ёрдамлардан фойдаланувчиларнинг ҳуқуқлари ва мажбуриятлари назарда тутиляпти. Ижтимоий хизмат ва ёрдамлардан фойдаланувчига ижтимоий хизматларни кўрсатишни тугатиш асослари, ижтимоий хизмат ва ёрдам турлари ҳамда ижтимоий хизмат стандартлари ҳам акс этмоқда.
Ижтимоий хизматлар бирламчи, ихтисослашган ва юқори ихтисослашган турларга ажратилмоқда. Шу билан бирга ижтимоий хизматлар фуқаронинг уйида, маҳалласида, ижтимоий объектларда ҳамда онлайн шаклда кўрсатилиши белгиланмоқда.
Мажлисда мазкур ҳужжат ижтимоий иш соҳасидаги муносабатларни тартибга солиш, аҳолининг эҳтиёжманд қатламларига ижтимоий хизматлар кўрсатиш тизимини яратиш ҳамда уларнинг ижтимоий ҳимоясини кучайтиришга қаратилгани қайд этилди.
2025 йилнинг февралида аҳолини ижтимоий ҳимоя қилиш тизимини молиялаштириш тартибини яхшилашга қаратилган президент фармони қабул қилинганди. Ҳужжат билан 2025 йилнинг 1 апрелидан “Ижтимоий дафтарлар” жамғармалари орқали кўрсатиладиган ижтимоий ёрдамлар Камбағал оилалар реестрига киритилган оилаларга берилиши белгиланди.
Изоҳ (0)