Ўзи 5 нафар фарзанднинг отаси бўла туриб, иккинчи хотинининг 11 яшар қизини зўрлаб келган эркак қўлга олингани ҳақида хабар берилган эди. Тошкент шаҳар судларининг “Дарё”га маълум қилишича, ҳолат юзасидан суд иши якунланди.
Блогер ниқоби остидаги шахс қонуний хотини бўла туриб, бошқа бир эркак билан расмий никоҳи бекор қилинмаган аёлни ўзига иккинчи хотин қилиб олган. Шу билан ҳам қониқмай, иккинчи хотинининг вояга етмаган (11 яшар) қизини ҳам мунтазам зўрлаб келган.
Президент ҳузуридаги Ижтимоий ҳимоя миллий агентлиги раҳбариятининг аралашуви билан боланинг ҳуқуқлари поймол бўлиши олди олинганди. Агентлик томонидан жабрланувчига зарур тиббий, психологик ва ижтимоий кўмак кўрсатилган.
Вояга етмаган шахсга нисбатан жинсий жиноят содир этган 31 яшар А.К. рад этиб бўлмас далиллар билан қўлга олинган. Унга нисбатан Жиноят кодексининг 119-моддаси 4-қисми (жинсий эҳтиёжини зўрлик ишлатиб ғайритабиий усулда ўн тўрт ёшга тўлмаган шахсга нисбатан қондириш) билан жиноят иши қўзғатилган.
Суд ҳукми билан эркак Жиноят кодексининг 168-моддаси 4-қисми “а” банди, 126-1-моддаси 3-қисми, 25,119-моддаси 4-қисми, 119-моддаси 4-қисми билан тайинланган жазолар аслича қолдирилиб, Жиноят кодексининг 59-моддасига асосан, тайинланган жазоларни қисман қўшиш йўли билан ўташ учун 16 йил 6 ой озодликдан маҳрум қилиш жазоси тайинланди.
Ҳукм қонуний кучга киргач, ундан жабрланувчи фойдасига жиноят оқибатида етказилган 254 653 783 сўм моддий зарар ундирилиши белгиланган.
Туркияда ўгай отаси жинсий тажовуз қилган ўзбекистонлик қиз ватанга қайтарилгани хабар қилинган эди.
2025 йил 26 май куни Тошкент шаҳрида Ўзбекистон Республикаси президенти ҳузуридаги Ижтимоий ҳимоя миллий агентлиги ва БМТнинг Болалар жамғармаси — ЮНИСEФ ҳамкорлигида давра суҳбати ташкил этилди. Конференцияда “Мажбуриятдан ҳаракатга: болаларга нисбатан зўравонликка барҳам бериш бўйича стратегия ва миллий истиқболлар” мавзуси муҳокама қилинди.
2024 йилда Ўзбекистонда болалар ҳуқуқлари бузилиши билан боғлиқ қуйидаги ҳолатлар қайд этилган:
- 412 нафар бола жинсий зўравонликдан жабрланган;
- 1 028 нафар бола жисмоний зўравонликка учраган;
- 929 нафар бола психологик босимни бошидан кечирган;
- 14 нафар бола эксплуатация қурбони бўлган;
- 106 нафар бола катталарнинг қатъий бефарқ муносабатига дуч келган.
Изоҳ (0)