Чўлдан ноқонуний равишда саксовул ўсимлигини кесганларни таъқиб қилган Бухоро вилояти Экология, атроф-муҳитни муҳофаза қилиш ва иқлим ўзгариши бошқармаси экологик назорат инспекцияси ходимлари калтакланди.
Экология вазирлигининг хабар қилишича, ходимлар 15 июль куни Бухоронинг Пешку тумани “Сафрон” чўл массивида рейд тадбири ўтказган. Рейдда 7 нафар ходим: инспекция бошлиғи Ж.Тошев, А.Қурбонов, Б.Рўзиев, Ж.Ядгаров, Ф.Муродов, Н.Муҳаммадиев ва О.Ҳесенов иштирок этган.
Рейд давомида инспекторлар Хоразм вилоятида яшовчи шахси номаълум фуқаролар ноқонуний равишда саксовул ўсимлигини кесиб, “ЗИЛ” русумли юк машинасига ортган ҳолда чўлнинг ички йўли орқали кетаётганини кўриб қолган ва бошқармага тегишли “ЖАК” автомашинасида юк машинасини таъқиб қилишган.
Кузатув давомида, тахминан, 110 километр масофадан сўнг юк машинаси Ғузор—Бухоро—Нукус А-380 автомобиль йўлининг Бухоро вилоятидан Хоразм вилояти йўлига чиқиб, ҳаракатни давом эттирган. Шундан сўнг Ж.Тошев автомобиль йўли бўйлаб 5 километр масофадан сўнг бошқарма инспекция ходимлари Н.Муҳаммадиев ва О.Ҳесеновни орқадан келаётган бошқа автомашиналарни назорат қилиш учун тушириб, ўзи “ЗИЛ” юк машинасининг ортидан кузатувни давом эттирган.
У юк машинасидан ўтиб кетганида, тахминан, 200 метр масофада Хоразм вилоятига тегишли Isuzu юк машинаси йўлини тўсган. Машинадан нотаниш фуқаролар қўлида ҳар хил турдаги совуқ қуроллар (бита, арматура, темир труба) билан тушиб келиб, бошқарманинг автомашинасини уриб пачоқ қилган ҳамда инспекция бошлиғини ҳар хил ножўя сўзлар билан ҳақоратлашган. Шундан сўнг Ж.Тошев воқеа жойидан кетган.
Бундан ташқари, ҳуқуқбузарлар бошқарма инспекция ходимлари Н.Муҳаммадиев ва О.Ҳесеновни юз ва тана қисмларининг барча соҳасига уриб, турли хил оғир тан жароҳатлари етказган (Н.Муҳаммадиевнинг оёғи синган). Кейин уларни юк машинасининг кузовига ўтқазиб, ўзлари билан олиб кетаётган вақтда инспекторлар ҳаракатланиб турган юк машинасидан сакраб, қочишга улгурган.
Айни дамда мазкур ҳолат юзасидан Хоразм вилояти Тупроққалъа туман прокуратураси томонидан тергов ишлари олиб борилмоқда.
2025 йил бошларида Олот туманида ноқонуний саксовул кесиб, олиб қочмоқчи бўлган 3 нафар фуқаро уларни таъқиб қилган инспекторларнинг машинасига қасддан шикаст етказганди. Уларга 41 миллион 625 минг сўм зарар ва жарима қўлланган.
Бухорода 2024 йилнинг биргина сентябрь—октябрь ойлари давомида саксовул билан боғлиқ 25 та ҳуқуқбузарлик аниқланганди. Табиатга 29 миллион 702 минг 400 сўм зарар етказилгани ҳисобланган ва 222 миллион 900 минг сўм жарима тайинланган. Ҳуқуқбузарлар жами 252 миллион 602 минг 400 сўм товон тўлаши белгиланган.
Изоҳ (0)