Бухоронинг Жондор тумани Варахша чўл массивидаги Лайлактепа ҳудудида вилоят экоинспекцияси ҳамда туман давлат ўрмон хўжалиги ходимлари ўртасида содир бўлган жанжал оқибатида инспекторнинг кўзи жароҳатланиб, автомашинасига шикаст етган ҳақида маълум қилинган эди. Жондор туман давлат Ўрмон хўжалиги бўлими бошлиғи Жасур Худойқулов жанжал аслида вилоят Экология ва атроф-муҳитни муҳофаза қилиш бошқармаси инспекторининг шахсий автомашинасида рейдга чиқиб, ўзини яқиндан таништирмагани сабабли бошланган, дея изоҳ берди.
Жасур Худойқуловга кўра, ушбу жанжал вақтида туман давлат Ўрмон хўжалиги бўлимининг 6 нафар ўрмончиси (Аминжон Муҳаммедов, Фарруҳ Ибодов, Санжар Файзиев, Нозимбек Холов, Солиҳ Ҳакимов, Замон Файзиев) ҳамда 1 нафар фуқаро (Негмурод Остонов) бўлган. Негмурод Остонов тумандаги «Обод» маҳалласида яшайди. Оиласи «темир дафтари»га киритилган. Маълум бўлишича, у туман давлат Ўрмон хўжалиги бўлими ходимлари билан доимий равишда тунги рейдларда холис гувоҳ, яъни жамоатчи инспектор сифатида қатнашиб келади.
«Дарё» мухбири ҳолатга ойдинлик киритиш учун воқеа иштирокчилари билан суҳбатлашди.
«Варахша чўл массивидаги Лайлактепа ҳудудида тунги соат 22:00 дан кейин оқ рангли ‘Нива’ ҳамда қора рангли Lacetti русумли автомашиналар тўхтаб турганди. ‘Ниваъдагилар ўзини экоинспекция ходимлари деб таништириб, рейдга чиқишганини билдирди. Lacetti’даги фуқаро кийимидаги киши эса ўзини таништиришни ҳам истамай, ишим бўлмаслигини айтиб, машина ойнасини кўтарди. Мен бу пайтда унинг машинаси қаршисида эдим. У эса ҳайдашга чоғланди, ўзимни ўнглаб олмаган ҳам эдим, машинасини юрғизди. Мени машинасининг олд капоти орқали 1-1,5 қадамгача судраб борди. Мен йиқилиб тушдим ва ўрнимдан туриб, жаҳл устида қўлимдаги саксовул таёғи билан Lacetti’нинг ён ва олд ойналарини синдириб ташладим», — деди Негмурод Остонов.
Негмурод Остоновнинг бу иддаосини эса ўша куни воқеа жойида бўлган вилоят Экология ва атроф-муҳитни муҳофаза қилиш бошқармаси бош мутахассиси Аъзам Ҳасанов рад этди.
«Бундай ҳолат юз бергани йўқ. Айнан шу киши бизга зўрлик ишлатиб, қўпол муомалада бўлди. Ваҳоланки, у холис гувоҳ сифатида рейдларда юрар экан, бундай талаб қўйишга ҳақли эмас. Ҳеч ким машинасини ўз-ўзидан ҳайдаб кетишга уринмайди. Ўша кезда жуда қийин вазиятда қолгандик. Қочиб, жонимизни сақлашдан бошқа чора қолмаганди. Ваҳоланки, унинг қўлида саксовулдан таёқмас, темир деталь эди. Экология инспекторининг у фуқарони машинасининг олд капотида судрагани мутлақо бўлмаган гап», — деди Аъзам Ҳасанов.
Жондор туман давлат Ўрмон хўжалиги бўлими бошлиғи Жасур Худойқулов ва жабрланувчи, экология инспектори Давлат Барноев воқеа содир бўлган куни ўрмон хўжалиги ходимлари уларни 60-65 километр масофагача таъқиб қилиб боришгани ҳақида гапиргани, аслида, бу масофа 14-15 километрни ташкил этишини билдирди.
«Дарё» мухбири бунга ҳам ойдинлик киритиш мақсадида жанжал бошланган жойдан темир йўл манзилигача бўлган масофа неча километрни ташкил этишига қизиқди. Ҳақиқатан ҳам ушбу оралиқ масофа 16 километрдан иборат эканлиги ойдинлашди. Бироқ муаммо таъқиб қилиб борилган масофанинг неча километрни ташкил этишини изоҳлашда эмас, балки ачинарли ҳолатнинг содир бўлганида.
Воқеа иштирокчиси бўлган Жондор туман давлат Ўрмон хўжалиги бўлими ўрмончилари суриштирув жараёнида 28 январь куни ўтказилган тунги рейдда экология инспекторларининг ҳеч қандай билдиришсиз ва рухсатномасиз чиқишганини, ўзларини таништиришмаганини айтишди.
Бухоро вилоят Экология ва атроф-муҳитни муҳофаза қилиш бошқармаси матбуот хизмати раҳбари Жаҳонгир Наврўзов эса бунга жавобан ҳудудлардаги қонун бузилиши ҳолатларининг олдини олиш бўйича ўтказилган назорат тадбири ва рейд Экология ва атроф-муҳитни муҳофаза қилиш давлат қўмитаси буйруғи асосида олиб борилганини тушунтирди.
Суриштирув жараёнида давлат Ўрмон хўжалиги бўлими ўрмончилари содир бўлган ҳолатдан пушаймонлигини, ёшлик қилиб қизиққонликка боришганини, аслида, узоқ йиллардан буён ҳамжиҳатликда ишлаб келишганини баён этди. Шунингдек, ўрмончиларга кўра, экоинспекция инспектори Давлат Барноев томонидан улар ёмон ва қўпол сўзлар ҳақоратланишмаган ҳамда жанжал вақтида уларни муштламаган ва тан жароҳати етказмаган.
Жасур Худойқуловнинг таъкидлашича, Жондор тумани Варахша чўл массивидаги ўрмон хўжалигининг жами ер майдони 88,436 гектарни ташкил этиб, шундан 68,115 гектари саксовулзор ҳисобланади.
«Ҳудуд катта ва кенг. Беш қўл баробар эмас, балки ўрмончиларимиз орасида ҳам ўз манфаатини кўзлаганлар бордир. Аммо шундайлар учраса, биз, албатта, чора кўрамиз. Бироқ экология инспекторлари таъкидича, саксовуллар ўрмон хўжалиги вакиллари томонидан ўғирлаб сотилмаётган, туманнинг чекка ҳудудларида яшовчи аҳолининг табиий газ таъминотидан узиб қўйилгани боис туман ҳокимлиги тавсияси билан муҳтож оилаларнинг аризаларига кўра, бир нечта аҳолига ҳамда ҳудуддаги мактабгача таълим муассасаларига бутоқланган саксовул шохлари ва таналаридан бепул етказиб берганмиз», — деди у.
Бухоро вилоят ИИБ ахборот хизмати раҳбари Шуҳрат Жалоловнинг «Дарё»га маълум қилишича, мазкур воқеа қамрови кенглиги, ўрганув давомида бир ҳолат кейинги бошқа бир ҳолат билан узвий боғланиб бораётгани воқеалар ривожини ошириб, суриштирув-тергов ишларининг давомийлигини таъминламоқда.
Изоҳ (0)