Президент фармойиши билан 2025/2026-ўқув йили учун давлат грантлари тасдиқланди. Ҳужжатга асосан, бакалавриат ва магистратура учун жами 45 минг 422 та давлат гранти ажратилади. Бугун, 19 июль куни Олий таълим, фан ва инновациялар вазирлиги соҳалар кесимида грантлар тақсимотини эълон қилди.

Бакалавриатда грантлар тақсимоти
Бу йил бакалавриатга қабул қилинган 35 минг 500 талабанинг ўқиши давлат бюджетидан молиялаштирилади. Энг кўп грантлар муҳандислик, ишлов бериш ва қурилиш соҳаларига ажратилди — 10 009 та.
Қолган соҳалар учун грантлар тақсимоти қуйидагича:
- Табиий фанлар, математика ва статистика — 4 905 та;
- Таълим — 4 650 та;
- Соғлиқни сақлаш ва ижтимоий таъминот — 3 450 та;
- Қишлоқ, ўрмон, балиқ хўжалиги ва ветеринария соҳаларига — 3 460 та;
- Санъат ва гуманитар фанлар — 3 166 та;
- Ахборот-коммуникация технологиялари — 2 230 та;
- Тиллар — 1 925 та;
- Бизнес бошқарув ва ҳуқуқ — 1 012 та;
- Хизматлар — 1 925 та;
- Ижтимоий фанлар, журналистика ва ахборот — 610 та;
- Транспорт хизматлари — 130 та.
Магистратурада грантлар тақсимланиши
Янги ўқув йилида 9 минг 922 та магистр давлат ҳисобидан таҳсил олиш имконига эга бўлади. Мазкур таълим шакли бўйича ҳам муҳандислик, ишлов бериш ва қурилиш йўналишларига ажратилган грантлар улуши кўп — 3 229 та.
Кейинги ўринларда табиий фанлар, математика ва статистика соҳаларида таҳсил олувчиларга 1 948 та грант ўрни берилади. Қолган йўналишлар бўйича грантлар тақсимланиши қуйидагича:
- Соғлиқни сақлаш ва ижтимоий таъминот —1 163 та;
- Қишлоқ, ўрмон, балиқ хўжалиги ва ветеринария — 1 124 та;
- Таълим — 517 та;
- Санъат ва гуманитар фанлар — 677 та;
- Гуманитар фанлар (тиллардан ташқари) — 140 та;
- Тиллар 395 та;
- Ижтимоий фанлар, журналистика ва ахборот — 124 та;
- Бизнес бошқаруви ва ҳуқуқ — 327 та;
- Ахборот коммуникация технологиялари — 635 та;
- Хизматлар —178 та.
Қўшимча грантлар
Давлат томонидан юқоридагилардан ташқари яна бир неча йўналишда грантлар ажратилиши белгиланди. Жумладан, хорижий ва нодавлат ОТМлар учун 1 320 та грант берилади. Хотин-қизлар учун 4 000 та, чет элдаги ўзбекистонлик ёшларга 30 та давлат гранти ажратилади.
Энди грантлар ҳар йили қайта тақсимланади
2025 йил 10 мартдаги ҳукумат қарорига кўра, эндиликда давлат грантлари ҳар ўқув йили якунлангандан кейин қайта тақсимланади. Янги тартиб бўйича контракт асосида таҳсил олаётган талабалар ҳам иккинчи ва ундан кейинги курсларда грантда ўқиши мумкин.
Грант асосида ўқишга кирган талаба бир йил давомида давлат ҳисобидан таҳсил қолади, унга стипендия берилади. Кейинги ўқув йилида ҳам грантда ўқиши учун эса биринчи курсдаги ўртача баҳоси (GPA) 3,5 балл ва ундан юқори бўлиши керак. Агар баллар белгиланган кўрсаткичдан паст бўлса, талабага иккинчи курсдан автоматик равишда грант берилмайди.
Таълим грантини иккинчи ва кейинги курсларда фақат GPA 3,5 ва ундан юқори бўлган талабалар сақлаб қолади. Яъни 3,5 дан паст балл тўпласа, талабанинг ўқиши контрактга ўтади (ўзи пул тўлаб ўқийди).
Аммо кейинги курсда GPA 3,5 ёки ундан юқорига кўтарилса, яна қайтадан грантга ўтиш имкони бор.
Грантлар асосан икки қисмга бўлинади. Биринчиси, тўлиқ грант — бир йиллик ўқиш пулини давлат тўлаб беради ва стипендия билан таъминлайди.
Тўлиқ бўлмаган грант — ўқиш пулининг ярмини давлат тўлайди, лекин стипендия берилмайди.
Шу билан бирга, қўшимча давлат гранти бор. У 4 ва ундан юқори GPA билан ўқиган, ижтимоий ҳолати оғир талабалар учун берилади.
Таълим грантига талабгорлар учун ОТМ расмий веб-сайтида онлайн рўйхатдан ўтиш ва эришган ютуқларини асословчи ҳужжатларни юклаш имконияти яратилади.
Грантларга талабгорлар олийгоҳлар ҳузурида ташкил этиладиган махсус комиссиялар томонидан баҳоланиб, натижалар янги ўқув йили бошланишидан олдин эълон қилинади.
Маълумот учун, жорий йилги қабул якунига кўра, давлат ОТМларига кириш учун рўйхатдан ўтган абитуриентлар сони 732 минг 411 нафарни ташкил этди. Бу сўнгги етти йил ичидаги энг кам миқдор ҳисобланади.
Изоҳ (0)