Yangi o‘quv yilida bakalavriatga 35 500 ta, magistratura bosqichiga 9 922 ta davlat granti beriladi. Bu bo‘yicha prezident farmoyishi qabul qilindi.
Joriy va kelgusi uch o‘quv yili uchun davlat oliy taʼlim tashkilotlariga grant asosida o‘qishga qabul qilish parametrlari tasdiqlandi.
Prezident farmoyishiga ko‘ra, 2025/2026-o‘quv yili uchun bakalavriatga (kunduzgi) 35 500 ta kvota beriladi (o‘tgan yili 34 838 ajratilgan).
Keyingi davrlarda grantlar soni quyidagicha:
- 2026/2027 o‘quv yiliga – 36 023 ta;
- 2027/2028 o‘quv yiliga – 36 460 ta;
- 2028/2029 o‘quv yiliga – 36 761 ta.
Yangi o‘quv yilida magistratura yo‘nalishi (kunduzgi) uchun 9 922 ta grant o‘rinlari ajratiladi (o‘tgan yili 9 365 ta berilgan). Shu bilan birga, 2026/2027-o‘quv yilida 10 191 ta, 2027/2028 o‘quv yilida 10 477 ta talaba davlat byudjeti hisobidan magistraturada o‘qishi mumkin. 2028/2029-o‘quv yilida esa talabgorlarga 10 784 ta grant taqdim etiladi.
Shuningdek, davlat tomonidan xorijiy va nodavlat OTMlar uchun 1 320 ta, chet eldagi o‘zbekistonlik yoshlarga 30 ta, xotin-qizlar uchun 4 000 ta grant belgilandi.
Qabul parametrlarining taqsimoti hududlar va sohalar ehtiyojiga qarab aniqlanadi. Bunda imtiyozga ega abituriyentlar uchun qo‘shimcha parametrlar inobatga olinadi. Bundan tashqari, ayrim sohalarning (tillar, sanʼat, sport va boshqalar) o‘ziga xosliklari hisobga olinadi.
Maʼlumot uchun, mamlakatda davlat granti avvalgidek to‘rt yilga bitta talabaga emas, balki har yili yuqori baholarga erishgan talabalar orasida qayta taqsimlanadi.
Izoh (0)