Жазони ижро этиш тизими учун ҳар йили 10-15 нафар малакали психолог кадрларга эҳтиёж мавжуд. Бу ҳақда Ички ишлар вазирлиги Жазони ижро этиш департаменти Ахборот хизмати “Дарё”га маълум қилди.
Айтилишича, Жазони ижро этиш департаменти пенитенсиар психологияси (жиноятчиларни қайта тарбиялаш психологияси) бўйича кадрларни тайёрлаш бўйича Тошкент давлат ўзбек тили ва адабиёти университети билан ҳамкорликни йўлга қўйган.
Олий таълим муассасалари билан ҳамкорлик ўрнатиш ҳамда талабаларни тизимга қизиқтириш орқали кадрларга бўлган эҳтиёжни қондириш мумкин. Чунки талабалар пенитенсиар тизим ҳақида тушунчага эга бўлишмаса, бу келгусида уларни ишга қабул қилганда касбга мослашишда қийинчилик туғдириши мумкин, дейилади Жазони ижро этиш департаменти ахборотида.
Департамент масъулининг тушунтиришича, маҳкумлик даври инсон учун жисмоний ҳамда руҳий жиҳатдан оғир вақт бўлиб, улар депрессия, ёлғизлик, стресс ва бошқа руҳий муаммоларга дуч келиши мумкин.
Маҳкумлар озодликка чиққанидан кейин жамиятга мослашиши керак. Психологик кўмак уларга бу жараёнда ёрдам беради. Шунингдек, маҳкумларга ўз хатти-ҳаракатларини таҳлил қилишга ва келажакда тўғри қарорлар қабул қилишга ёрдам беради.
Маҳкумлар ўз муаммоларини ҳал қилишнинг конструктив усулларини ўрганиши мумкин, бу эса уларнинг қайта жиноят содир этиш эҳтимолини камайтиради, дейди мутахассис.
Маълумот учун, пенитенсиар психология (тузатиш психологияси, ахлоқ тузатиш меҳнат психологияси) маҳкумларни қайта ижтимоийлаштиришнинг психологик асосларини ўрганади: уларнинг бузилган ижтимоий шахсий фазилатларини тиклаш, жазони ўташ жараёнида уларнинг шахсиятлари динамикаси (яъни муддатни ўташ). Маҳкумлар ижтимоийлашув жараёнида ўз қадриятларини қайта кўриб чиқиши, улар учун ижобий мақсадлар қўйишни ўрганиши ва ижтимоий ижобий хулқ-атвор кўникмаларини ривожлантириши мумкин.
Изоҳ (0)