Фаластин Футбол Ассоциацияси (ФФА) 2026 йилги Жаҳон чемпионати саралаши 3-босқичида юз берган баҳсли пенальти қароридан норози бўлиб, FIFA ва Осиё Футбол Конфедерациясига (ОФК) расмий шикоят юборди.
Муаммоли ҳолат 10 июнь, сешанба куни Фаластин ва Уммон терма жамоалари ўртасида ўтказилган ҳал қилувчи ўйинда юз берди. Фаластин жамоаси 1:0 ҳисобида олдинда бораётган бир пайтда, эронлик ҳакам Моуд Бонядифард қўшимча вақтда — аниқроғи, 90+7-дақиқада Уммон фойдасига пенальти белгилади.
Уммонлик футболчи Иссам Ал Сабҳи пенальти зарбасини аниқ амалга ошириб, ҳисобни 1:1 кўринишга келтирди. Ушбу дуранг натижа Уммонни саралаш босқичининг кейинги даврасига олиб чиқди, Фаластин эса саралашни шу ерда тугатишга мажбур бўлди.
ФФА ўз баёнотида шундай деди:
Расмий ўйин ёзувлари ҳамда ижтимоий тармоқларда тарқалган турли видеолавҳаларни синчиклаб ўрганган ҳолда шуни таъкидлаймизки, пенальти қарори зарур ҳакамлик мезонларига жавоб бермайди. Техник жиҳатдан бундай ҳолатда пенальти белгиланиши асоссиз эди. Ушбу қарор бизнинг терма жамоамизга нисбатан адолатсизлик бўлди.
Фаластин Футбол Ассоциацияси FIFA ва ОФКни ушбу ҳолат юзасидан тўлиқ суриштирув ўтказишга ва ҳакамлик процедураларини қайта кўриб чиқишга чақирди. Уларнинг таъкидлашича, бу каби чоралар спорт адолатини тиклаш ҳамда халқаро мусобақаларнинг ҳалоллигини таъминлаш учун зарур.
Фаластин ҳам, Уммон ҳам бунгача ҳеч қачон Жаҳон чемпионатида иштирок этмаган. Ҳозирда Уммон 2026 йилда АҚШ, Канада ва Мексикада бўлиб ўтадиган кенгайтирилган (48 жамоали) турнирга йўлланма олиш имкониятини сақлаб қолмоқда.
Саралашнинг кейинги босқичида Уммон уч жамоали гуруҳда иштирок этади ва Индонезия, Ироқ, Қатар, Саудия Арабистони ёки Бирлашган Араб Амирликларидан иккита жамоа билан баҳс олиб боради. Агар Уммон гуруҳда ғолибликни қўлга киритса, бу жамоа тарихда илк бор Жаҳон чемпионатига йўл олиш имконига эга бўлади.
Изоҳ (0)