Ўзбекистон вақтинчалик пешқадам, омадсиз Эрон ва корейсларни ортда қолдираётган Туркманистон. ЖЧ—2022 саралаши гуруҳларидаги вазият ҳақида

14—19 ноябрь кунлари Осиё минтақасида ЖЧ—2022 ва Осиё Кубоги—2023 мусобақалари саралаш босқичининг иккита тур ўйинлари бўлиб ўтди. «Дарё» гуруҳлардаги ҳолат билан таништиради.

«А» гуруҳи

5-тур доирасида гуруҳ етакчилари Сурия ва Хитой терма жамоалари ўзаро баҳс юритди. Унда сурияликлар 2:1 ҳисобидаги ғалабани қўлга киритди. Мазкур ўйиндан кейин хитойликлар устози Марчелло Липпи истеъфо беришини маълум қилди. Чин юрти вакилларининг бу йўқотишидан Филиппин унумли фойдаланди ва Мальдивни мағлуб этган ҳолда Хитой билан очколар борасида тенглашиб олди. Кейинги турда эса Хитой дам олди ва Сурия ўзида Филиппинни минимал ҳисобда мағлуб этган ҳолда гуруҳ етакчилигини мустаҳкамлаб олди.

Гуруҳда Сурия 15 очко билан якка пешқадам бўлиб турибди. Унинг ортидан Хитой ва Филиппин (7 очкодан) бормоқда. Битта захира ўйинига эга Хитой етакчидан 8 очкога ортда қолмоқда.

«B» гуруҳи

Ушбу гуруҳда ҳам кураш жуда қизғин тус олмоқда. Австралия 5-турдаги марказий баҳсда Иорданияни 1:0 ҳисобида мағлуб этишга эришди. Кувайт эса Хитой Тайпейига жавобсиз тўққизта гол урди. Кейинги турда Хитой Тайпейи Иордания майдонида меҳмон бўлди, унда мезбонлар 5:0 ҳисобида зафар қучди. Кувайтликлар 6-турда Непални мағлуб этган ҳолда гуруҳдаги вазиятни ўзи учун ўнглаб олди. Австралия эса бу турда дам олди.

Гуруҳ жадвалида қолганлардан бир ўйин кам ўтказдан Австралия юз фоизлик натижа билан пешқадам бўлиб турибди. «Кенгурулар» Кувайт ва Иорданияни икки очкога ортда қолдирмоқда.

«C» гуруҳи

Осиё жамоалари ичида ФИФА рейтингида етакчилик қилаётган Эрон бу сафар ҳам йўқотишга учради. 5-турнинг марказий ўйинларидан бири Ироқ ва Эрон терма жамоалари ўртасида кечди. Унда ироқликлар ҳакам томонидан қўшиб берилган вақтда (90+2) гол урган ҳолда ғалабани илиб кетди. Баҳрайн ўша турда Гонконг билан дуранг ўйнаб қўйди (0:0). Кейинги турда Баҳрайн сафарда Ироқдан очко тортиб олди (0:0).

Шу тариқа, Эрон битта ўйин кам ўтказиб, етакчи Ироқдан (11 очко) беш очкога, Баҳрайндан эса уч очко ортда қолмоқда.

«D» гуруҳи

14 ноябрь куни барча гуруҳларда бўлгани каби Ўзбекистон терма жамоаси қатнашаётган гуруҳда ҳам етакчилар тўқнаш келди. Вадим Абрамов бошчилигидаги Ўзбекистон терма жамоаси Саудия Арабистонини меҳмон қилди. Мазкур баҳсда икки бор олдинга чиқиб олган «оқ бўрилар» сўнгги дақиқаларда ўтказиб юборилган голлар туфайли ғалабани қўлдан чиқарди. Гуруҳнинг иккинчи ўйинида Яман ўзида Фаластиндан устун келди.

6-турни Ўзбекистон терма жамоаси Фаластинга қарши ўтказди. Тошкентдаги «Пахтакор» стадионида бўлиб ўтган ўйинда Элдор Шомуродовнинг дубли эвазига ўзбекистонликлар дастлабки турдаги мағлубият реваншини олди. Нариги ўйинда Сингапур термаси Яманни таслим этди. Саудия Арабистони эса бу турда дам олди.

6-турдан сўнг Ўзбекистон терма жамоаси 9 очко билан етакчилик қилмоқда. Иккинчи поғонада битта захира ўйинига эга Саудия Арабистони (8) бормоқда. Кучли учликни 7 очко билан Сингапур якунлаб берган. Шунингдек, Яман (5) ва Фаластин (4) терма жамоалари ҳам имкониятни сақлаб турибди.

«E» гуруҳи

Қолган гуруҳлардан фарқли равишда мазкур тўртликдаги кураш ноодатий ва паввис руҳда кечмоқда. 2022 йилги Жаҳон Чемпионати мезбони ҳисобланган Қатар термаси ва Уммон гуруҳда пешқадамлик қилмоқда. Уммон ўтган икки турда ғалабага эришган ҳолда вазиятни яхшилаб олди. 5-турда дам олган Қатар кейинги ўйинда Афғонистонни минимал ҳисобда мағлуб этди.

Гуруҳда Қатар 13 очко билан етакчилик қилмоқда, ундан бир очко кам жамғарган Уммон иккинчи ўринни эгаллаган. Кейинги ўриндаги Афғонистон (4) етакчилардан анча ортда қолмоқда. Осиё Кубоги—2019 мусобақасида ўзини яхши томондан кўрсатган Ҳиндистон терма жамоаси ҳали бирорта ҳам ғалабага эриша олмади ва 3 очко билан 4-поғонага жойлашган.

«F» гуруҳи

Бу гуруҳда кутилганидек Япония терма жамоаси ўз гегемониясини ўрнатди. 5-турда «кўк самурайлар» Қирғизистонга ташриф буюрди ва ортга ғалаба билан қайтди. Тожикистон эса кутилмаганда Мьянмага ютқазиб қўйди. Кейинги турда мянмаликлар Моғулистонни ҳам енгган ҳолда кетма-кет иккинчи ғалабасини тантана қилди. Қирғизистон ва Тожикистон ўртасидаги Марказий Осиё дербисида кучлар тенг келди.

Шу тариқа йўқотишларсиз кетаётган Япония 12 очко билан якка пешқадам бўлиб турибди. Қолганлардан битта ўйин кам ўтказган японлар энг яқин таъқибчилари бўлмиш Қирғизистон ва Тожикистонни беш очкога ортда қолдирмоқда.

«G» гуруҳи

5-турда Вьетнам ўз майдонида БАА билан тўқнаш келди. Унда мезбонлар минимал ҳисобдаги ғалабани қайд этган ҳолда амирликлар жамоасини қийин аҳволга солиб қўйди. Малайзия эса Таиланд ва Индонезия устидан ғалабага эришиб, очколарини 9 тага етказиб олди. Вьетнам кейинги ўйинда Таиланд билан баҳс юритди ва бу учрашувда нурсиз дуранг қайд этилди.

6-турдан сўнг мағлубиятсиз серия қайд этаёган Вьетнам 11 очко билан гуруҳ етакчилигини ўз қўлига олган. Малайзия эса (9) иккинчи ўринни банд этди. Таиланд 8 очко билан учинчи поғонанини эгаллаб турибди. Гуруҳда биринчи саватчадан сараланган БАА эса (6) кутилмаганда тўртинчи поғонага тушиб кетди, бироқ амирликларда битта захира ўйини мавжуд.

«H» гуруҳи

Бу гуруҳ ўйинлари ҳам кутилмаган натижа ва интригага бой ўтмоқда. Гуруҳнинг яққол фаворити Жанубий Корея сафарда Ливан дарвозасига йўл топа олмади ва «Осиё йўлбарслари» кетма-кет иккинчи ўйинда дуранг қайд этди. Туркманистон эса 5-турда Шимолий Кореяни ўзида қабул қилиб, ишончли ғалабани (3:1) қўлга кириди. Кейинги турда туркманлар Шри-Ланкага имкон қолдирмади. Ливан эса КХДР билан ҳам нурсиз дуранг қайд этди.

Шу тариқа кетма-кет икки ғалабадан кейин Марказий Осиё вакили 9 очко билан гуруҳ пешқадамига айланди. Битта кам ўйин ўтказган Жанубий Корея, Ливан ва КХДР жамоалари 8 очкодан жамғариб, кейинги ўринларни эгаллаб турибди.

Шу билан саралаш баҳслари 2020 йилнинг март ойи охирига қадар танаффусга чиқди. 2020 йилнинг март ва июнь ойларида бўлиб ўтадиган тўртта турдан сўнг ЖЧ—2022 учинчи саралаш босқичига йўл олган 12 та жамоа номи маълум бўлади. ЖЧ—2022 иккинчи саралаш босқичида ўз гуруҳида биринчи ўринни эгаллаган саккиз терма жамоа тўғридан тўғри учинчи саралаш босқичи иштирокчисига айланади. Иккинчи ўринлар орасида энг яхши натижага эга тўртта терма жамоа ЖЧ—2022 ҳал қилувчи саралаш босқичига йўлланмани қўлга киритади.  Шунингдек мазкур жамоалар 2023 йилги Осиё Кубогига ҳам йўл олади

Осиё Кубоги—2023 нинг қолган иштирокчилар эса қуйидагича аниқланади:

Қолган 12 та терма жамоа Осиё Кубоги учинчи саралаш босқичига йўл олиш учун плей-офф босқичида иштирок этади (ўйинлар уй-сафар тизимида ўтказилади). Ушбу 12 та терма жамоадан саккизтаси учинчи саралаш босқичига чиқади.

Учинчи босқичда 24 та терма жамоа Осиё Кубогига йўл олиш учун олтита гуруҳга бўлинган ҳолда 12 та йўлланма учун кураш олиб боради. Ўйинлар уй-сафар тизимида ўтказилади ва гуруҳларда дастлабки иккита ўринни эгаллаган жамоалар Осиё Кубогига йўл олади. Ва юқоридаги 12 та илк йўлланма соҳибларига қўшилиб, мусобақа иштирокчилар сонини 24 тага етказади.

Нодирхон Ҳамидхонов тайёрлади