Испания прокуратураси Мадриднинг “Реал” клуби ва Испания терма жамоаси ҳимоячиси Рауль Асенсио учун 4 йиллик қамоқ жазосини талаб қилмоқда. Бу ҳақда Marca нашри хабар бермоқда.
Маълумотларга кўра, Асенсио вояга етмаган қиз иштирокидаги видео ёзувни сақлаш ва уни бошқа шахсларга кўрсатишда айбланмоқда. Бундан ташқари, яна бир жабрланувчи Асенсио устидан шунга ўхшаш даъво аризасини тайёрламоқда. Ҳар икки жабрланувчига “психологик жароҳат ва стресс синдроми” ташхиси қўйилган, уларнинг фикрига кўра, Асенсионинг машҳурлиги ҳолатни янада оғирлаштирган.
Рауль Асенсио жабрланувчилар билан яқин муносабатда бўлмаган. Бироқ у шахсий ахборотни тарқатиш ҳамда вояга етмаган шахсга оид ножўя мазмундаги материални намойиш этиш билан боғлиқ моддалар асосида айбланмоқда.
Прокуратура маълумотига кўра, Асенсио ушбу видеони рухсатсиз тарзда қўлга киритган ва уни бошқа бир кишига кўрсатган. Шу боис у қуйдаги ҳолатлар бўйича айбланмоқда:
- Видеоёзув жабрланувчиларнинг розилигисиз тайёрланган,
- Жабрланувчилар материалнинг ўчирилишини сўраган,
- Видеодаги шахслардан бири вояга етмаган бўлган.
Шикоятга кўра, жабрланувчи томон Асенсиога нисбатан қуйидаги миқдорларда моддий ва маънавий зарарлар учун компенсация талаб қилмоқда:
- 27 000 евро – вақтинчалик руҳий ва жисмоний жароҳатлар учун,
- 21 000 евро – стресс ва психологик асоратлар учун,
- 10 000 евро – маънавий зарарлар учун
Шунингдек, жабрланувчи томон адвокатлари Асенсиони кунига 10 евро ҳисобида 20 ой давомида жарима тўлашга, шунингдек, “Реал” футболчиси сифатидаги мақомини инобатга олган ҳолда 58 минг евро миқдорида қўшимча моддий компенсация тўлашга мажбур этишни талаб қилмоқда. Яна уч нафар гумонланувчи учун эса 4 йил-у 10 ойлик қамоқ жазоси сўралган.
Изоҳ (0)