Молиявий эксперт Шеннон Маклей 2025 йилда молиявий барқарорликка эришиш учун қайси одатдан воз кечиш кераклиги ҳақида ўз тавсиясини берди. Унинг сўзларига кўра, импулсив харидларни амалга ошириш имконини берадиган мобил иловаларни смартфондан ўчириб ташлаш лозим.
“Биз пул топиш учун астойдил ишлаймиз, меҳнат қиламиз. Шу сабабли бугунги кунда ўйламай туриб пул сарф қилиш жараёнини ўзимиз учун иложи борича қийинлаштириш керак”, деди у.
Шенноннинг таъкидлашича, тўлов иловалари харажатлар жараёнини жуда соддалаштириб юборади, натижада пул қандай сарфланиб кетаётганини сезмай ҳам қоламиз. Кўплаб одамлар ўз даромадлари қаерга кетаётганини англамаслиги энг катта муаммодир:
“Мижозларимдан тез-тез эшитаман: ‘Ишлайман, лекин пул қаёққа кетаётганини тушунмайман’ дейишади. Бу эса, одатда, харажатларни назорат қилмаслик оқибати ҳисобланади” дейди мутахассис.
Молиявий қийинчиликлар кўпинча хавотир туйғуси билан кечади, бу эса одамларни пул мавзусидан қочишга мажбур қилади. Бироқ Маклей таъкидлаганидек, молиявий ҳолатни ўзгартиришга ҳаракат қилишдан тўхтамаслик зарур.
Тадқиқотларга кўра, одамларнинг 73 фоизи пул сабабли стрессга тушади. Шу сабабли мутахассис молиявий барқарорлик томон кичик қадамдан бошлашни тавсия қилади:
“Харажатларингизни ёзиб боринг, уларни махсус иловалар орқали ёки оддий телефон эслатмаларига ҳам қайд этиш мумкин. Бундай усул бюджетни онгли бошқаришга йўл очади”, дея якунлади Маклей.
Изоҳ (0)