АҚШ президенти Россия билан бўлган муносабатларда “сабр косаси тўлмоқда”. Дональд Трамп Владимир Путин атайлаб Украина бўйича тинчлик музокараларини чўзаётганига ишонмоқда. Бу ҳақда АҚШ давлат котиби Марко Рубио 26 июль, шанба куни Fox News телеканалига берган интервьюсида маълум қилди.
“Менимча, у (президент) шундан тобора кўпроқ асабийлашяпти: Владимир Путин билан жуда яхши мулоқот ва телефон қўнғироқларига қарамай, бу ҳеч нарсага олиб келмаяпти. Шу сабабли энди ҳаракат қилиш вақти келди, ва менимча, президент жуда аниқ қилиб билдирди: у кўп тоқат қила олмайди. У Россия томони урушни тугатиш учун қандайдир чора кўришини кутиб, бундан буён вақтни бой беришни истамайди”, деди АҚШ давлат котиби.
Рубио: “Трамп тузоққа тушмайди”
Унинг сўзларига кўра, Трамп Путин билан музокараларни вақт чўзиш учун олиб борган деб ҳисоблайди: “Бу мулоқотнинг катта қисми аслида вақт ютишга ва урушни чўзиш тактикасидан фойдаланишга қаратилган эди”. АҚШ президенти “бу тузоққа тушмайди”, дея таъкидлади Рубио.
“Энг аввало, ҳаммамиз АҚШ президенти Дональд Трамп тинчликка эътибор қаратаётганидан хурсанд бўлишимиз керак. У урушларни тўхтатиш, олдини олиш ва тинчлик келишувларининг бир қисми бўлишни ҳамма нарсадан кўпроқ хоҳлайди. Бу унинг уруши эмас, у бу урушни бошламаган, уни мерос қилиб олди. Ва у бунга чек қўйиш учун қўлидан келган ҳамма нарсани қилди”, деди АҚШ давлат котиби.
Трамп Путинга Украина бўйича битим учун 50 кун муддат берди
14 июль куни НАТО бош котиби Марк Рютте билан Оқ уйда ўтказилган музокараларда Трамп шундай деди: агар яқин 50 кун ичида (2 сентябргача) Украина бўйича тинчлик келишувига эришилмаса, АҚШ ҳукумати Россиянинг савдо ҳамкорларига нисбатан қўшимча 100 фоизлик божлар жорий қилади.
Кейинроқ АҚШ президенти Украинадаги тинчлик музокараларида, жумладан, у билан Путин ўртасида “доимий музокаралар” бўлаётганини айтди. Кейин эса ракеталар Киевга учиб, одамларни ўлдиради, - дея давом этди Трамп.
“Ракеталар Киевга учиб, одамларни ўлдирмоқда. Буни тўхтатиш керак”, деган эди АҚШ президенти. Унинг қўшимча қилишича, “Путиндан ҳафсаласи пир бўлган” ва у билан бир неча ой олдин тинчлик келишувига эришишга умид қилган.
Изоҳ (0)