Олий Мажлис Қонунчилик палатасининг 26 ноябрь куни “2025 йил учун Ўзбекистон Республикасининг давлат бюджети тўғрисида”ги қонун лойиҳасининг муҳокамасига бағишланган йиғилишида “Миллий тикланиш” демократик партияси фракцияси раҳбари Алишер Қодиров ўқитувчилар фаолияти самарадорлигини баҳолаш тизими йўқлиги ҳақида фикр билдирди.
“Албатта, бугунги геоиқтисодий беқарорлик даврида биз ҳукуматимиздан барқарор фаолият ва, албатта, молиявий мувозанатни талаб қилиш билан биргаликда президентимиз томонидан иқтисодий ўсишни таъминлаш каби жуда жиддий масалалар қўйилди.
Бу вазифалар бажарилишининг ўзи бўлмаслиги ҳаммамизга маълум. Жуда оғир. 2025 йилнинг бюджетини муҳокама қилаётганимизда ушбу мураккабликларни ҳисобга олган ҳолда ўргандик. Фракциямиз барча аъзолари бюджетномани қўллаб-қувватлади. Айрим масалаларда биз ўзимизнинг таклифларимизни иккинчи ўқишда атрофлича муҳокама қилишда бердик.
Бу маблағларни қўшиш ёки қўшимча маблағларни топиш нуқтайи назаридан эмас. Режалаштирилган маблағлардан самарали фойдаланиш мақсадига алоҳида урғу беряпмиз. Бу қандай?
Масалан, таълим тизимига жуда катта пул ажратиляпти. Бу жуда тўғри, биз буни қўллаб-қувватлаймиз. Таълим ва тарбия тизимида биз муваффақиятга эришмасак, иқтисодий барқарор ривожланиш мақсадларимизга эришолмаймиз. Лекин 50 триллионга яқин ўқитувчиларнинг маошига режалаштирилган маблағдан биз кутган натижага эришоламизми-йўқми, деган саволни қўйдик.
Биз доим бу саволни Мактабгача ва мактаб таълими вазирлигига қўямиз. Лекин кеча биз бу саволни Молия ва иқтисодиёт вазирлигига қўйдик. Айтдик, ўқитувчининг фаолияти самарадорлигини ўлчаш учун бирорта тизимимиз борми? Биз яхши ўқитувчига кўп ойлик, ёмон ишлаётган ўқитувчига кам ойлик бериш орқали мактабда ўқитувчилар ўртасида рақобат тизимини яратайлик.
Ўқитувчи болаларимизга яхши билим берсин. Яхши билим бераётган ўқитувчига кўп ойлик, рақобатбардош бўлмаган ўқитувчи кам ойлик олиб, тизимдан чиқиб кетишига ҳам розимиз. Бизнинг фарзандларимиз энг яхшисига муносиб.
Айнан шу сабабли ажратилаётган маблағга эътирозимиз йўқ, унинг самарадорлигини ошириш бўйича тизим ишлаб чиқариш масаласида вазирликка таклиф бердик”, дейди Алишер Қодиров.
Алишер Қодиров ўтган йилги бюджет муҳокамасида таълим-тарбия соҳасига бюджетдан ажратилаётган пуллар самараси бўйича муаммолар борлигини, ўқитувчиларга сарфланаётган маблағлар ўз натижасини бермаётганини айтиб ўтган эди.
Изоҳ (0)