Владимир Ильич Ленин вафот этганига 100 йил тўлиши муносабати билан “Учрашув жойи” ток-шоусида рус шовинист тарихчиси Михаил Смолин “инқилобдан олдин озарбайжон, ўзбек ва қозоқлар ҳеч қачон бўлмаган”, деган даъво билан чиққанди. Олий Мажлис Қонунчилик палатаси спикери ўринбосари Алишер Қодиров Смолиннинг чиқишига муносабат билдирди.
“Қадимги туркий миллатлар, жумладан, уларнинг энг мустаҳкам қўлларидан бири қарлуқнинг боши — ўзбекларнинг 3 минг йиллик давлатчилигини оддий инсон билмаслиги мумкин, лекин тарихчиман дегани билмаса, бундай илмсиз тарихчини эътиборсиз қолдириш керак.
Албатта, 3 минг йилнинг етарлича тўғри ва янглишлари бўлган.
Шу янглишларнинг энг каттаси, фикримча, қудратга тўла даврида Темурни Московиянинг устидан эмас ёнидан ўтиб кетгани бўлса керак. Устидан ўтиб кетганида, қаердан келганимизни муҳокама қилиш даражасида ақлсизлик қилишмаган бўлар эди…
Давлатчилик тажрибамизнинг муҳим хулосаси — эл бўлмасдан ўзимиз билан ўзимиз тортишаверсак, яна зўравонга қул бўламиз!”, — деб ёзади Қодиров.
Шунингдек, Алишер Қодиров 3 фоизга ҳам бормайдиган рус ватандошлар учун таълим ва телевидениеда рус тили номутаносиб даражада кўплигини таъкидлаган.
“Бу номутаносиблик тузатилиши керак. Биринчидан, Ўзбекистонда бошланғич таълимни она тилида ўқилиши бўйича норма қонунга киритилиши мумкин. Иккинчидан, қозоқ, озар, қирғиз, туркман, турк ва тожик қардошлар билан телекўрсатувлар алмашишни йўлга қўяйлик. Фракциянинг яқин мажлисларида бу масалаларни муҳокама қилмоқчимиз”, — дейди депутат.
Эслатиб ўтамиз, аввалроқ Россия ТИВ ёзувчи Захар Прилепиннинг шу мазмундаги баёнотига ҳам жавоб қайтарган ва унинг сўзлари Москванинг расмий позициясини акс эттирмаслигини билдирган.
Изоҳ (0)