Oliy Majlis Qonunchilik palatasining “2024-yil uchun O‘zbekiston Respublikasining Davlat budjeti to‘g‘risida”gi qonun loyihasining muhokamasiga bag‘ishlangan majlisida “Milliy tiklanish” demokratik partiyasi fraksiyasi rahbari Alisher Qodirov o‘qituvchilarga ajratilayotgan budjet mablag‘larining samaradorligi past bo‘layotganini aytib o‘tdi.
“Maktabgacha va maktab taʼlimi vazirligining joriy xarajatlari uchun ajratilgan mablag‘ning 80 foizga yaqini, yaʼni 35 trillion so‘mga yaqin mablag‘ faqatgina o‘qituvchilarning oylik maoshiga yo‘naltirilmoqda.
Biz o‘qituvchilarga yuqori maosh to‘lash haqidagi fikrni jamiyatga ilgari surdik. Haqiqatan ham shunday bo‘lishi kerak. O‘qituvchi yuqori maosh olishi kerak. Chunki o‘qituvchi kelajakni yaratadi. Biz o‘zimiz tomonimizdan “Pedagoglarning maqomi to‘g‘risida”gi qonunni qabul qildik. Uni maqom va qonuniy himoyasi nuqtayi nazaridan ishlayapmiz. Lekin mablag‘ kamaymayapti, ko‘paygandan ko‘paymoqda. Nima uchun o‘qituvchilarga yaratilayotgan shu sharoit bizga yangi kelajak umidlarini uyg‘otib berolmayapti? Nima uchun oliy taʼlim muassasalariga topshirgan abituriyentlarning 50 foizga yaqini hatto 2 bahoga loyiq bo‘lgan ko‘rsatgichni ham qayd etolmadi?
Afsus bilan aytish kerak sarflanayotgan mablag‘larimiz va kiritayotgan investitsiyalarimiz o‘z samarasini, natijasini ko‘rsatmayapti. Biz ko‘p pul so‘rayotganimiz yo‘q, pulni oshiringlar yoki ko‘paytiringlar, deb so‘rayotganimiz yo‘q. Berilayotgan mablag‘ning natijadorligi haqida gapiryapmiz.
O‘qituvchilarga 35 trillion so‘mga yaqin oylik berilyapti, 500 ming nafarga yaqin o‘qituvchilarimiz bor. Bizdagi tahlillarimizga qaragandan 10-15 foiz atrofida o‘qituvchilarimizda ortiqchalik bor, yaʼni maktabda zarurat bo‘lmagan muallimlar ham ishlayapti. Biz hali sifat haqida gapirayotganimiz yo‘q”, — dedi Alisher Qodirov.
Uning alohida taʼkidlashicha, o‘qituvchi bugungi o‘quvchiga kutilayotgan ilmni berolmayotganligining sabablari juda ko‘p.
“O‘qituvchini ayblash eng oson yo‘l. Lekin bolalar shakllanishi juda tezlashib ketdi. O‘qituvchi konspekt tayyorlab, 1-2 kun ketkazib tayyorlagan maʼlumotni o‘quvchi 5 soniyada internet orqali olib qo‘ymoqda, zamon shunchalar tezlashdi. Endi o‘qituvchi zamonga moslashishi kerak. Pedagogik metodolgiya o‘zgarishi kerak.
Bizni taklifimiz bo‘lardiki, davlat rahbari tomonidan bevosita eʼtibor qaratilayotgan taʼlim-tarbiyadagi islohotlarda qo‘yilayotgan investitsiyalarning samaradorligi haqida vazirlik juda jiddiy bosh qotirishi kerak.
O‘qituvchilarni malakasini oshirish, ularga yuqori ish haqi berish bilan birgalikda ularning bugungi kundagi zamonaviy talablarda ishini to‘g‘ri baholash tizimni yaratishimiz kerak. Buni inson omilini aralashtirmasdan qilamiz, degan gapga vazir o‘rinbosari “Qiyin masala” deb aytdilar. Butun bitta kamera orqali bitta o‘qituvchi faoliyatiga baho berish qiyin emas. O‘qituvchi 45 daqiqa davomida bolalarga nima berdi? To‘g‘ri taʼlim berdimi yoki noto‘g‘ri berdimi, samarali dars o‘tdimi yoki aksincha, deb baho berish qiyin emas”, — dedi “Milliy tiklanish” demokratik partiyasi fraksiyasi rahbari.
Avvalroq bosh vazir o‘rinbosari nima uchun tarkibida shakar bo‘lgan gazli ichimliklarning bir litriga 500 so‘m aksiz solig‘i solinayotganiga izoh bergan edi.
Izoh (0)