Қашқадарё вилоятидаги Шаҳрисабз шаҳри ҳокимлигининг ҳудуддаги тадбиркордан 701 миллион сўмдан ортиқ қарздорлиги бор. Қарздорлик масаласи судда ҳам кўриб чиқилиб, ижрога ўтган. Аммо неча ойлар ўца-да, ижро таъминланмаяпти. Бу ҳақда “Дарё”га ҳокимликдан пулини ололмаётган тадбиркорнинг ўзи ҳикоя қилиб берди.
Шаҳрисабз шаҳрининг “Оқсарой” маҳалласида яшовчи Олим Хидировга кўра, иш судда 2024 йил 23 апрелда кўриб чиқилган.
“Лок бўёқ” МЧЖ раҳбариман. Президентимизнинг 2022 йил Қашқадарё вилоятига ташрифига тайёргарлик чоғида ташкилотимиз “Мебел ишлаб чиқариш” лойиҳасини амалга ошириш, шунингдек, Шаҳрисабз шаҳрининг тарихий қисмини ободонлаштириш, кўкаламзорлаштириш ишларини бажариб, 1 миллиард сўмлик шартнома шартини бажарган. Бу пулнинг 500 миллион сўмини бизга 2023 йилнинг учинчи чорак даромадлари режасини ошириб бажарилган қисмидан тўлаб берамиз, дейишганди. Айни кунгача 1 миллиард сўм маблағдан атиги 200 миллион сўм олдим. Шу ишларни бажариш учун қилинган харажатларим ҳисобига айни кунда анча қарзга ботдим. Пулларимни ҳар куни сўрайман, лекин натижа йўқ, дейди тадбиркор.
Тадбиркорнинг маълумот беришича, унга тўланган 200 миллион сўм вилоят ҳокимлиги томонидан тўлаб берилган бўлиб, қолган пуллар ҳам босқичма-босқич тўланиши билдирилган.
Вилоят ҳокимининг биринчи ўринбосари Алишер Қодиров қолган пуллар ҳам секин-аста тўлаб берилишини айтиб, мурожаатимга жавоб берган экан. Лекин мен кутишдан чарчадим. Банкрот бўлдим. Қарзга кирдим, дейди тадбиркор.
“Дарё”га тақдим қилинган ҳужжатлардан англашилишича, Шаҳрисабз шаҳрининг собиқ ва айни кундаги раҳбарлари 1 миллиард сўмлик қарздорликни тўлаш учун вилоят ҳокимидан ёрдам сўраб, хат ёзган.
Шаҳрисабз шаҳрининг айни кунда лавозимдаги раҳбари Шерзод Бўриев “Дарё” журналистининг такрорий қўнғироқларига жавоб бермади.
-liw6REl1.jpg)
Ҳокимликнинг ҳозирда меҳнат таътилида бўлган ахборот хизмати раҳбари Гулнора Узоқованинг тушунтириш беришича, ҳоким бу ҳақдаги мурожаатларга жавобан қарздорлик собиқ ҳоким даврида юзага келганини, қарздорлик миқдори катта ва буни шаҳар маҳаллий бюджетидан қоплаш имконсиз эканини айтган.
Собиқ ҳоким Акром Сулаймонов эса бунга жавобан ҳокимликка келиб, қарздорлик унинг шахсий томорқасини ободонлаштиришдан келиб чиқмаганини, давлат раҳбари ташрифи пайтида ҳудудда амалга оширилган иш учун юзага келганини айтиб, тадбиркорнинг пули мавжудлигини тасдиқлаган. Шунга қарамасдан муаммо ҳалигача ечим топмаган.
МИБ Қашқадарё вилояти бошқармаси масъулларининг ҳолатни изоҳлашича, қарздор — Шаҳрисабз шаҳрининг тарихий қисмини ободонлаштириш, кўкаламзорлаштириш ва сақлаш департаментининг мол-мулки қарздорликни қоплаш учун аукцион савдога қўйилган.
Қарздор — Шаҳрисабз шаҳрининг тарихий қисмини ободонлаштириш, кўкаламзорлаштириш ва сақлаш департаментининг давлат рақами 70 623 ҚБА бўлган “КамАЗ” русумли автотранспорт воситаси хатланиб, 1 миллиард 209 миллион сўмга баҳоланган ҳамда 2 август куни аукцион савдосига чиқарилган. Ушбу автотранспорт воситаси сотувидан тушган пул маблағлари қарздорликни қоплашга йўналтирилади, дейди масъуллар.
“Дарё” мазкур ҳолат бўйича масъулларга минбар беришга тайёрлигини эслатиб ўтади.
Изоҳ (0)