Камбожа бош вазири Хун Манет 14 июль куни мамлакатда 2026 йилдан ҳарбий хизматга чақирув бошланишини маълум қилди. Бу ҳақда Euronews хабар берди.
Қарор Таиланд билан чегарада давом этаётган кескинлик сабаб қабул қилингани таъкидланган. Хун Манет 2026 йилдан бошлаб етишмовчиликларни тўлдириш ва армиянинг имкониятларини ошириш учун армияга чақирув бошланишини билдирган. Унинг айтишича, чақирув орқали армияга олдин қўшилган аскарлар кўнгилли кучларга қараганда профессионал ва самаралироқ натижа кўрсатган.
Армияга чақирув тўғрисидаги қонун 2006 йилда қабул қилиниб, шу кунгача ҳеч қачон амалга оширилмаган эди. Камбожа армиясида 18 ёшдан 30 ёшгача бўлган эркак ва аёллар хизмат қилиши лозим. Лекин ҳарбий хизмат аёллар учун мажбурий эмас.
Тахминларга кўра, Камбожа қуролли кучларининг умумий сони 200 минг кишини ташкил этади. Таиландда эса 350 минг фаол аскарлар мавжуд. Икки мамлакат ўртасидаги муносабатлар 28 май куни бўлиб ўтган қуролли қарама-қаршиликдан сўнг кескин ёмонлашганди. Ҳодисада бир нафар камбожалик аскар ҳалок бўлган.
Томонлар кейинги тўқнашувларга йўл қўймаслик учун зиддиятни юмшатишга келишиб олган. Аммо иккала давлат ҳам бир-бирига қарши чоралар кўриш ва таҳдид қилишда давом этмоқда. Ушбу можаролар Таиланднинг ички сиёсатига ҳам таъсир кўрсатган.
Таиланд бош вазири Паэтонгтарн Шинаватра июль ойи бошида Камбожанинг собиқ бош вазири Хун Сен билан телефон орқали суҳбат қилган. Бу сўзлашув интернетда тарқалиб кетиб, Шинаватранинг лавозимдан кетишига сабаб бўлганди.
Изоҳ (0)