АҚШнинг сайланган президенти Дональд Трамп амалдаги раҳбар Жо Байденни солиқ тўловчиларининг Украинага йўналтирилган маблағларини ўзлаштиришда айблади.
Трамп ўзининг Truth Social ижтимоий тармоғидаги саҳифасида амалдаги президентнинг “Байденомика” деб номланган иқтисодий сиёсатининг асосий йўналишларини тасвирловчи расмни эълон қилди.
Республикачига кўра, “Байденомика” қуйидагича ишлайди: америкаликлар солиқ тўлайди, Байден уларни Украинага жўнатади; украинлар бу маблағларни Ҳантер Байденга беради, у эса пулни отасига қайтаради, шундан сўнг ўғлини афв этади.
Ҳантер Байден 2014 йил апрель ойида Украинанинг Бурисма газ компанияси директорлар кенгашига аъзо бўлди. Байден ўша пайтда АҚШ вице-президенти эди. Тез орада Америка оммавий ахборот воситалари кичик Байден отаси ёрдамида Бурисма манфаатларини ҳимоя қилиш имкониятига эга бўлгани, бунинг учун катта миқдорда пул олиши мумкинлиги ҳақида ёзди.
Айрим республикачиларга кўра, уларнинг бир қисмини у отасига топширган бўлиши мумкин. Буни тасдиқловчи далиллар мавжуд эмас.
Ҳантернинг афв этилиши
Байден лавозимини тарк этиши олдидан қурол-яроғ савдоси ва солиқ қонунбузарликлари билан боғлиқ жиноятлари учун ҳукм қилинган ўғли Ҳантер Байденни афв этди.
Мен ўғлим Ҳантерни афв этиш тўғрисидаги фармонни имзоладим. Лавозимни эгаллаганимдан бери Адлия вазирлигининг қарорларига аралашмаслигимни айтган эдим ва ўғлимнинг адолатсиз равишда суд тартибида таъқиб қилинаётганини кузатганимда ҳам сўзимда турдим, дейилади Байден баёнотида.
Президент ўғлининг таъқиб қилиниши айнан уларнинг қариндошлик алоқалари ва сиёсий рақиблар босими билан боғлиқлигини айтди. Унинг фикрича, суд жараёни қўпол сиёсат таъсирига учраган ва шу сабабли суд хатосига йўл қўйилган.
Умид қиламанки, америкаликлар ота ва президент сифатида бундай қарорга келганимнинг сабабини тушунишади, деган Жо Байден.
Трамп буни “мансаб ваколатини суиистеъмол қилиш” ва “адолатни поймол этиш” деб атаганди.
Изоҳ (0)