ҲАМАС Ғазо секторида ўт очишни тўхтатиш бўйича келишув лойиҳасини ўзгартиришни талаб қилди. Исроил бош вазири Биньямин Нетаньяху эса бу талабни “қабул қилиб бўлмайди” дея рад этди. Бу ҳақда Deutsche Welle хабар берди.
Исроил бош вазири 6 июль куни Қатарда музокаралар бўлиб ўтишини айтди. Унда сулҳ тузиш ва ҲАМАС томонидан гаровга олинган исроилликларни озод қилиш муҳокама қилинади.
Нетаньяху 7 июль куни Вашингтонга расмий ташриф билан бориши режалаштирилган. У АҚШ ҳукумати қўллаб-қувватлаган сулҳ таклифини президент Дональд Трамп билан муҳокама қилади.
ҲАМАС музокараларга тайёр
ҲАМАС 4 июль куни Ғазо секторида тинчлик бўйича музокараларга тайёр эканини билдирди. Бироқ гуруҳ Ғазода қолган исроиллик гаровдагилар озод қилингач, Исроил ҳарбий ҳаракатларни қайта бошламаслигига қатъий кафолат берилишини талаб қилмоқда.
Трамп ҲАМАСнинг баёнотини “Бу яхши”, дея баҳолади ва келишув келаси ҳафтадаёқ эришилиши мумкинлигини айтди. Оқ уй раҳбарининг сўзларига кўра, у оптимистик кайфиятда, гарчи вазият ҳар куни ўзгариб турса ҳам.
AFP агентлиги Фаластин делегациясидаги манбаларга таяниб, ҳозирда музокаралар столида халқаро воситачиларнинг 60 кунлик янги тинчлик таклифи турганини хабар қилди. Ушбу таклифга кўра, ҲАМАС Ғазо секторида ҳали ҳам гаровда ушлаб турилган исроиллик асирларнинг ярмини — 22 кишини озод қилиши лозим. Бунга жавобан Исроил бир неча фаластинлик маҳбусни қўйиб юборади.
Изоҳ (0)