Ўзбекистонда йил бошидан буён газ ва электр энергиясидан ноқонуний фойдаланиш оқибатида давлат манфаатларига 622 млрд сўмдан ортиқ зарар етказилди. Бу ҳақда 8 июль куни Электр энергияси, нефть маҳсулотлари ва газдан фойдаланишни назорат қилиш инспекцияси ахборот хизмати раҳбари Наврўз Норбобоев маълум қилди.
2024 йилнинг шу даврида 550 млрд сўмдан ортиқ электр энергияси ва табиий газдан ноқонуний фойдаланилгани аниқланганди.
Наврўз Норбобоевнинг қайд этишича, Ўзэнергоинспекция томонидан ҳуқуқни муҳофаза қилувчи органлар ва электр ҳамда газ таъминоти корхоналари мутахассислари билан ҳамкорликда 2025 йил бошидан ўтказилган назорат тадбирларида 1 394 нафар истеъмолчи томонидан табиий газ ва электр энергиясидан ноқонуний фойдаланиш ва қоидабузарлик ҳолатлари аниқланган. Бу вақт давомида 118,8 миллион метр куб табиий газ (294,8 млрд сўм) ва 197,1 млн киловатт соат электр энергияси (327,5 млрд сўм) ноқонуний фойдаланилган.
Истеъмолчилар томонидан энергия ресурсларидан фойдаланиш қоидаларини бузиш билан боғлиқ ҳуқуқбузарликлар бўйича 2 333 та маъмурий иш расмийлаштирилди. Хусусан, ўтказилган назорат тадбирларида аниқланган ҳолатларнинг 1 078 таси электр энергияси, 1 255 таси эса табиий газдан фойдаланишда қоидабузарликка йўл қўйилган.
Наврўз Норбобоевнинг билдиришича, энергия ресурсларидан айрим “тадбиркор”ларнинг ноқонуний фойдаланишлари тармоқларда ортиқча юкланишларга ҳамда энергия ресурслар таъминоти барқарорлигига жиддий таъсир кўрсатмоқда.
Ўзбекистонда эндиликда электр энергияси, газ ва сув тармоқларига ноқонуний уланиб, ўғирлаганлик учун жавобгарлик кучайтириши кутилмоқда. Энергия ресурсларидан беҳуда фойдаланиш билан боғлиқ ҳуқуқбузарликлар бўйича якка тартибдаги тадбиркорлар ҳам жавобгарликка тортилиши режалаштирилган.
Изоҳ (0)